Sangyaw alang sa kalig-on ug kalipay

Solemnidad sa pagsaka sa atong Ginoo Hesukristo sa Langit (May 17, 2026)
Acts 1:1-11 / Ps 47:2-3, 6-7, 8-9 / Eph 1:17-23 / Mt 28:16-20

Karong Dominggoha, ang Pagsaka sa Langit sa Ginoo, gisaulog nato sa tibuok kalibotan ang adlaw sa sosyal o katilingbanong komumikasyon. Si Santo Papa Leo nagpahimangno sa importansiya sa pagpreserba sa dagway ug tingog.

Niining kalibotan nga usahay maluya ang pagtoo sa Dios ug wala nay kalipay, ang Ginoo nagpadayon pagpakita kanato sa iyang dagway ug nagpabati kanato sa iyang tingog. Sumala sa Ebanghelyo, “apan ang pipila kanila nagduhaduha…miduol si Jesus” ug misulti kanila. Manghinaot kita nga makita unta nato ang dagway sa Ginoo ug madunggan unta nato siya matag tambong nato sa Santos nga Misa ug sa pagsaulog sa mga sakramento. Mabati unta nato siya ug madunggan nga miduol kanato matag himamat nato sa mga nanginahanglan. Masinati unta nato nga siya miduol kanato sa panahon nga kita gisulayan ug gisakit.

“Hatagan unta kamog kaalam ug pagsabot sa mga gipadayag aron kamo hingpit nga makaila kaniya.” Kini nga mga pulong sa ikaduhang pagbasa, maoy pag-ampo ni San Pablo nga kita unta mas magasahan sa lalom nga pag-ila sa pagpadayag niya. Ang ministriya, pagtudlo ug pagsakripisyo ni Kristo maoy pagpadayag nga siya ania nakig-uban kanato. Sa mga panghitabo sa giyera, kaguliyang o sakit sa panglawas, adunay mensahe ang Ginoo aron siya mas mailhan nato. Ato untang mabati nga siya buot nga mailhan nato isip Dios nga nagpangga sa matag adlaw natong paningkamot.

Wala magkulang ang atong Manunubos nga namatay ug nabanhaw sa pulong ug buhat aron siya mailhan ug masuod nato. “Sa una kong sinulat gihisgutan ko ang tanang butang nga gibuhat ug gitudlo ni Jesus sukad sa pag sugod niya sa iyang buluhaton hangtod sa adlaw nga gibayaw siya ngadto sa langit.” Kini ang baruganan ni San Lukas diha sa iyang gisulat sa mga Buhat sa Apostoles. Kini atong nadungog karon sa unang pagbasa. Ang buhat ug pulong nag-uban diha kang Kristo aron mas mabati nato ang iyang pakighiusa kanato. Siya Mao ang dagway sa Amahan nga kanato nakig-uban. Ang iyang tingog mao ang tingog sa Amahan.

Busa, kita usab unta mamahimong dagway ug tingog sa Ginoo alang sa uban, aron makahatag kitag kali-on ug kalipay. Ang pakigrelasyon sa matuod nga dagway ug tingog sa tawo, wala diha sa artipisyal nga kahibalo, kondili anaa sa tiunay nga gipamulong ug presensiya nga maoy susi sa kali-on ug kalipay. “Ang Ginoo nga Dios misaka ngadto sa iyang trono uban sa singgit sa kalipay ug tingog sa mga trumpeta.”