Summer Youth Festival Camp 2026

Human sa unom ka tuig nibalik na gayud pag-usab ang among tinuig nga panagtapok sa mga kabatan-onan sa parokya sa The Most Sacred Heart of Jesus Parish Calinan. Puno sa kadasig ug pagmaya, malampuson ug mabungahon nga nahuman ang Summer Youth Festival Camp 2026 nga gidumala sa Parish Youth Apostolate niadtong Mayo 15-17, 2026 didto sa BSP Camp Malagos, Malagos Baguio District, Davao City nga naay tema: “Young Church in Mission: Be Rooted, Radiant and Ready”. Ang Summer Youth Festival Camp mao ang pinaka dako nga kalihukan ug panagtapok sa mga kabatan-onan sa parokya. Adunay 700 plus ka mga kabatan-onan gikan sa nagkalain-laing kapilya nga sakop sa maong parokya aron magtinabangay sa pagpalig-on sa ilang pagtuo, panaghigalaay, ug pag-alagad sa Ginoo.

Sulod sa tulo ka adlaw nga kampo, ang mga delegado nakigbahin sa nagkalain-laing kalihokan sama sa espirituhanong pagpamalandong, team building, sports activities, cultural presentations, dula, ug fellowship activities. Pinaagi niini, mas napalig-on ang ilang panaghiusa, disiplina, pagpangulo, ug kooperasyon isip mga batan-ong Kristohanon.

Ang kalampusan sa maong kalihokan nahimong posible pinaagi sa suporta ug dedikasyon sa among Kura Paroko nga si Fr. Pepe, sa among maabtikon kayo nga Youth Spiritual Director Fr. Calexto ug kay Fr. Raul, ang supoporta ug panabang sa Parish Pastoral Council, sa Parish Youth Apostolate Core Group, facilitators, volunteers, sponsors, GSL sa nag kadaiyang mga GKK, ug sa tanang naghatag sa ilang panahon, kusog, ug panalangin aron mahimong malinawon ug malampuson ang kampo.

Labaw pa sa kalingawan ug mga kalihokan, ang Summer Youth Festival Camp 2026 nahimong usa ka panaw sa pagtuo, pagkat-on, ug pagbag-o sa kinabuhi sa mga kabatan-onan. Pagpamalandong sa ilang tagsa-tagsa ka mga tawag. Nanguli sila dili lamang sa matahum nga mga handumanan kondili usab sa mas lig-on nga pagtuo, panaghigalaay, ug kadasig sa padayon nga pag-alagad sa Ginoo ug sa Simbahan ilabina sa ilang tagsa-tagsa ka mga Gagmay’ng Kristuhanong Katilingban. (Noel A. Parado | Most Sacred Heart of Jesus Parish – Calinan)