ANC Nagsaulog sa Ika-12 nga Anibersaryo, Sportsfest 2026 Giablihan

Malampusong gisaulog sa Archdiocesan Nourishment Center (ANC) ang ilang ika-12 nga anibersaryo ug opisyal nga pag-abli sa Sportsfest 2026 pinaagi sa usa ka Misa Pasalamat nga gihimo sa REMASE Chapel sa St. Francis Xavier Regional Major Seminary of Mindanao niadtong Mayo 30, 2026.

Ang maong kasaulogan gipangulohan sa halangdong Arsobispo sa Davao, Most Rev. Romulo G. Valles, D D., uban sa Executive Director sa ANC nga si Rev. Msgr. Paul A. Cuison ug uban pang mga kaparian sa Arkidiyosesis sa Davao.

Napuno sa pagpasalamat ug kalipay ang sulod sa kapilya diin nagtigom ang mga benefactors, donors, volunteers, relihiyoso, ug mga kabataan nga nakabenepisyo sa mga programa sa ANC. Ang maong kasaulogan usa ka pagpamatuod sa 12 ka tuig nga matinud-anong pag-alagad sa kabataan ug mga pamilyang nanginahanglan sa dakbayan sa Davao.

Ang Archdiocesan Nourishment Center usa ka proyekto sa Archdiocesan Council of the Lay Apostolate and Integrated Movements (ACLAIM). Nagsugod kini isip usa lamang ka feeding activity sa Barangay 23-C niadtong 2014 ug mitubo ngadto sa usa ka city-wide feeding program nga karon nagserbisyo sa nagkalain-laing komunidad sa Davao City. Nagdala kini sa ilahang tagline nga “Nourishing Hope, One Child at a Time.”

Lakip sa mga programa sa ANC ang paghatag ug pagkaon pinaagi sa ilang flagship program nga “Rice for Life,” suporta sa edukasyon, pag-atiman sa panglawas, ug espirituwal nga pag-giya sa mga kabataan. Sa pagkakaron, adunay mga Nourishment Centers sa Bucana 1, Bucana 2, Agdao, Bankerohan, Talomo ug uban pang mga lugar sa dakbayan.

Sa iyang homiliya, gibutyag ni Archbishop Valles nga ang nag-unang kusog ug inspirasyon sa ANC mao ang gugma sa Diyos. Matud pa niya, ang misyon sa ANC dili lamang paghatag ug pagkaon kondili usab sa pag-atiman sa lawas, hunahuna, ug espiritu sa matag bata. “Si Jesus mismo ang naghatag kanato sa Iyang kinabuhi ug gugma. Ang gugma ni Kristo mao ang nagduso kanato sa pag-alagad,” matud sa Arsobispo.

Gipahinumduman usab niya ang tanan nga ang mga kabataan usa ka gasa gikan sa Diyos ug dili usa ka palas-anon. Gidayeg usab niya ang tanang mga benefactors ug volunteers nga sulod sa 12 ka tuig nagpadayon sa pagsuporta sa misyon sa ANC.

Gihisgutan usab sa Arsobispo ang ehemplo ni Santa Maria isip inahan nga mahigugmaon ug matinagdanon. Nag-awhag siya nga ang mga nag-atiman sa mga kabataan sa ANC mahimong sama kang Maria nga puno sa gugma ug pagkamaloloy-on.

Human sa Misa Pasalamat, gisundan kini sa pormal nga pag-abli sa Sportsfest 2026 nga gitambongan sa mga volunteers, benefactors, religious communities, ug mga kauban sa misyon sa ANC. Ang maong kalihokan gitumong aron mapalig-on ang panaghigalaay, panaghiusa, disiplina, ug espiritu sa pagtinabangay tali sa mga partisipante.

Ang mga nagdumala sa ANC nagpahayag sa ilang dakong pasalamat sa tanang benefactors, donors, partners, ug volunteers nga nahimong instrumento sa kalampusan sa organisasyon sulod sa milabay nga dose ka tuig.

“Ang inyong pagkamanggihatagon nakahatag ug paglaum ug mas maayong kaugmaon sa daghang kabataan ug pamilya. Hinaut nga magpadayon ang atong panagtinabangay alang sa kaayohan sa komunidad ug sa mas daghang mga kabataan nga atong gialagaran,” matud sa mensahe ni Mr. Ed Pacana, usa mga nagmugna sa ANC.

Ang pagsaulog sa ika-12 nga anibersaryo ug Sportsfest 2026 nahimong usa ka malungtarong pagpamatuod nga pinaagi sa gugma sa Diyos ug panaghiusa sa komunidad, posible ang pagbatok sa kagutom ug paghatag ug paglaum sa matag bata.

Malipayong ika-12 nga Anibersaryo, Archdiocesan Nourishment Center, ug malampusong Sportsfest 2026 sa tanan! (Rowena Baldoza Villaflor | OLLP Soccom Coordinator)