Awitan ko ang kaayo sa Ginoo sa kanunay

Ika-13 nga Domingo sa Ordinaryong Panahon (June 28, 2026)
2 Kgs 4:8-11, 14-16 / Ps 89:2-3, 16-17, 18-19 / Rom 6:3-4, 8-11 / Mt. 10:37-42

Taliwala sa mga hagit ug pagsulay nga atong giatubang, angay natong awitan sa kanunanay ang kaayo sa Ginoo. Ngano man?

Tungod kay ang atong pagkamadawaton ug maatimanon ilabina sa mas nanginahanglan, dili gayod palabyon nga walay ganti. Sama sa nadungog nato sa unang pagbasa, ang pag-abi-abi sa Propeta nagbunga sa grasya sa usa ka anak. Ang Dios mohatag gayod og balos, bisan tuod dili nato maoy tuyo sa pagbuhat og maayo sa uban, sa atong gihimo sa isigkatawo. Ikaw ba mibati ug miabi-abi sa mga mas nagkinahanglan?

Mao usab kini ang gisaysay sa Ebanghelyo. Ang maghatag og tubig nga mainom sa mga giuhaw, ang modawat sa usa ka Propeta, ang mo dawat sa pinadala sa Dios, nakadawat og ganti. Mahimo nato kini kung dili lamang ang atong kaugalingon ang hunahunaon, kung dili lamang ang sarili ang atong luwason, kondili ang isigkaingon usab. Isip tinun-an ni Jesus, mopas-an kita sa atong krus pinaagi sa pagpalabi sa uban kaysa atong kaugalingon. Ikaw ba nagtan-aw unsay makatabang nga mahaw-as ang uban sa ilang kalisod nga gipas-an?

Sa ikaduhang pagbasa, pagkadaku sa grasya nga gihatag sa Dios kanato pinaagi sa pag-ambit sa iyang bunyag nga maoy nagluwas kanato gikan sa sala. Wala nay gahum ang kamatayon alang kanato nga mosunod kang Kristo kay siyay nagpakamatay alang sa atong mga sala. Gihatagan kita niyag katakus sa paglikay sa sala. Ikaw ba nagpahimulos gihapon sa pagpakasala o nagkinabuhi suway sa iyang kabubot-on?

Diha sa pag-abi-abi, pag-atiman sa uban ug paglikay sala, ang grasya sa Dios molambo. Busa, sa kanunay awitan ta ang kaayo sa Ginoo sa kanunay.