Birhen Maria Sumbanan sa Pagkamasinugtanon

BIRHEN MARIA: Sumbanan sa Pagkamasinugtanon, mao kini ang tema sa Culmination Day sa Flores de Mayo nga gipahigayon niadtong Mayo 30, 2026 sa St. Mary of the Perpetual Rosary Parish, Buhangin isip pahinungod kang Birhen Maria. Gitambongan kini sa mga kabataan sa napulo ka sona nga sakop sa parokya inubanan sa mga katekista ug mga ginikanan nga miduyog sa ilang mga anak sa pagsuporta sa maong kalihukan. Kini usa ka timaan sa dakong gugma sa inahan ngadto sa iyang anak sama sa paghigugma ni Birhen Maria sa iyang anak nga si Jesus.

Sa alas nuybe sa buntag nagsugod ang Santos nga Rosaryo ug paghalad sa mga letra sa Ave Maria inubanan og kanta nga gipangulohan ni Sis. Malou Pantonial. Human sa Santos nga Rosaryo, gisunod dayon ang paghalad og mga bulak pahinungod kang Birhen Maria.

Nagsugod ang Santos nga Misa sa alas diyes y medya sa buntag nga gipangulohan sa Kura Paroko sa St. Mary of the Perpetual Rosary Parish, Rev. Fr. Orlando A. Angelia, diin iyang gipaambit kung unsay papel ni Maria sa atong tanan, nga siya inahan natong tanan, ug ngadili ka tinuod nga kristiyano kung wala ka nagpasidungog kang Maria. Ang pag-ampo sa Santos nga Rosaryo panawagan kini ni Birhen Maria sa mga bata didto sa Fatima Portugal. Si Maria ug Jesus kanunay nato kauban sa kasakit ug kalipay.

Pagkahuman sa Santos nga Misa, nagpadayon ang programa didto sa Parish gym kung diin adunay Zonal Patron Saint presentation sa mga nagkadaiyang Imahe ni Birhen Maria. Adunay usab community dance, quiz bee ug ang matag sona naay giandam na mga sayaw og kanta nga nakapalingaw sa mga nag tan-aw.

Pinaagi sa pagtinabangay sa mga katekista nga gipangulohan ni Ma’am Jo Devera, PSP parish coordinator, suporta sa ginikanan sa mga kabataan ug sa Kura Paroko, Fr. Orlando Angelia nahimong malampuson ang gipatigayon na Flores De Mayo Culmination Day.

VIVA MARIA! VIVA JESUS!

(Annielyn Aunso Abe | Photos by Esay Moreno)