Isangyaw ang katarong ug dunggon ka sa Dios

Ika-12 nga Domingo sa Ordinaryong Panahon (June 21, 2026)
Jer 20:10-13 / Ps 69:8-10, 14, 17, 33-35 / Rom 5:12-15 / Mt 10:26-33

Kinsa man karon ang gilutos? Mipadayon ba sila sa pagsaksi batok sa bakak? Misalig ba sila sa kaluwasan ug panabang sa Dios?

Tingali nasinati nato ug nasaksihan nga kadtong magbuhat sa katarung isalikway ug pahilumon. Kadtong naghupot ug mibarog alang sa kaangayan ug kamatuoran pakgangon ug pugngan gayod aron ang mga nagbuhat sa bakak ug binuang dili madayag. Mao kini ang nasinati ni Propeta Jeremias sa unang pagbasa. Siya gibitik, gitamay ug gilutos tungod sa iyang pagsangyaw sa kaangayan. Apan sa iyang pagsalig ug pagmantala sa kaayo sa Dios, siya gipanalipdan ug naluwas. Iampo nato ang mga naghupot sa gahum, ilabina diha sa senado ug kongreso ug ang mga gipili nga mga pangulo nga unta dili sila maoy manglutos, kondili mao untay mobarug sa katarung bisan gilutos.

Tingali nasinati nato ug nasaksihan nga kadtong mga nagsulti sa kamatuoran mamiligro ang kinabuhi. Gani kadtong maghatag og testimoniya batok sa mga nangawkaw ug nangurakot usahay mohilom na lamang tungod kay namiligro ang ilang kinabuhi. Mao kini ang hagit ni Kristo diha sa Ebanghelyo. Iyang gilig-on ug gidasig ang mga nakasaksi sa hiwi nga mga buhat sa pagbutyag ug pagbuyag, pagtul-id ug pagpakgang, ug sa pagbarug ug pagmalig-on batok niini. Walay kausaban ang nasod ug katilingban kung dili imantala ang pagharong sa sayop aron mohari ang kamatuoran. Ang mokanta ug mosaksi alang sa katarung atimanon sa Dios ug dili sila mapukan. Iampo nato ang mga mosaksi ug naghatag og testimoniya sa bisan unsang mga kaso ug imbestigasyon nga unta magmaisog sila sa pagdapig sa tinuod ug dili sa bakak.

Tingali nasinati nato nga kita gitubos ug naluwas taliwala sa mga kapait ug pagkaipit. Nakasaksi kita nga aduna gayuy moabot nga hinabang ug kaluwasan sa gitakdang panahon bisan usahay wala nato damha. Makaamgo kita nga daku gayod ang grasya nga molihok ang Ginoo, kay kung kita ra dili nato makaya. Mao kini ang gipasabot ni San Pablo ngadto sa mga taga Roma diha sa ikaduhang pagbasa. Iampo nato ang matag Pilipinhon nga mokarga unta sa mga kabug-at niining panahona uban sa pagsalig sa dakong grasya sa Dios. Mao na unta kini karon ang higayon nga ang tagsa-tagsa motahan sa iyang kaugalingon aron motunhay ang kaayo ug ka angayan alang sa kaayohan sa tanan.

Busa hinumdomi nga bisan aang nagbuhat sa katarong gisalikway, ipadayon ang pagmantala sa kamatuoran. Salig lamang kay ang kaluwasan ang pagtubag sa Dios maimoha. Iampo lamang: Ginoo, sa imong dakung gugma, tubaga ako.