Mga PSL sa SILP Lumondao Padayong Nagtoon sa Tabang sa PSL2 Seminar

Kabahin sa kalamboang Espiritwal sa matag GSL mao ang padayon nga pormasyon ug pagtoon sa atong Doctrina ingon man usab sa atong mga responsibilidad isip pangulo sa GKK. Mga responsibilidad nga angayng masabtan sa matag usa aron mas makahuluganon ang pagpuyo niini ug adunay kahapsay sa dagan sa parokya.

Ang abli nga kasingkasing ug huna huna alang sa pagtoon ug pagdawat sa mga kabag-ohan, makatabang sa matag usa kanato aron mas masabtan nato ang atong gidawat nga mga papel isip piniyalan. Gikan sa pagtoon sa Doktrina sa Simbahang Katoliko nga gihimo uban sam ga mensahero sa Catholic Faith Defender niadtong Abril 18,2026 ang Ministriya sa Pangulo sa Liturhiya nagpadayon sa pagtoon sa ilang papel ug responsibilidad. Sa ingon niini mas masabtan sa matag usa ang ilang papel isip katambayayong sa Kura Paroko sa mga kasaulogan nga pagahimoon sa GKK.

Niadtong Mayo 30, 2026, gipahigayon ang Phase 2 seminar sa mga Pangulo sa Liturhiya sa parokya. Adunay nubyenta ka mga PSL nga mitambong sa PSL2 Seminar. Ang mga PSL naggikan sa singkwentay dos ka Gagmayng Kristohanong Katilingban sakop sa Parokya.

Matud pa sa PSL Coordinator, Bro. Eddie Bantilan nga dugay nang panahon nga nagpahigayon ug PSL2 Seminar ang parokya, Onse na katuig ang milabay. Matud pa, dako ug tabang ang gipahigayon nga PSL2 Seminar. Adunay upat ka topic ang maong Seminar: Ang una mao ang SACRAMENTS and SACRAMENTALS ni Sis Edith Asis; ANG LITURHIYA nga gisaysay ni Sis Flor Abrasaldo; RITO SA KRISTOHANONG PAGLUBONG ug ANG KASAULOGAN SA ADLAWNG DOMINGO KON WALA ANG PARI UG ANG KASAYSAYAN SA PAGKALAWAT GAWAS SA KASAULOGAN SA YUKARISTIYA O SANTOS NGA MISA nga gihatag ni Bro Cipriano Genosas Jr. Ang mga speakers naghatag ug mas tin-aw nga pagpasabot kung unsa kini ka mahinungdanon dinha sa pagpangalagad isip PSL.

Ang PSL2 Seminar usab nagpaklaro sa dugang buluhaton sa mga Pangulo sa Liturhiya kon sila pagatugotan sa Kura Paroko nga makahimo ug mga sakramental ug blessings sama sa panalangin sa tawo, butang o dapit ngadto sa lubanganan ug pagpakalawat sa GKK panahon sa KSD. Gipaklaro usab ni Bro Loloy Genosas Jr nga kani nga mga buluhaton usa ka pribilihiyo nga buluhaton ug kinahanglang gayud ang pagtugot sa kura paroko.

Matud pa sa mga PSL mas nasabtan nila ang daghang butang nga usahay nakalimtan na sa uban kanila tungod sa kadugayon. Pinaagi niini, mas nasabtan usab sa mga bag ong PSL ang kalainan sa nakaseminar ug Phase 2. Kung ang Pangulo sa Liturhiya nakaseminar ug Phase 1, adunay mga kasaulogan nga dili siya makahimo sam asa pagpakalawat; apan kung kompleto ang Seminar makahimo siya sa tanang kasaulogan ubos sa pagtugot sa Kura Paroko.

Nahimong malampuson ang PSL Phase2 Seminar sa San Isidro Labrador Lumondao. Mapasalamaton ang Ministriya sa mga mamumulong nga gipadala sa Archdiocesan Liturgical Center.

Dalaygon ang Dios!

(Echerica U. Yamba|SILP Lumondao SocCOM Parish Coordinator)