“Totus Tuus Maria”

Mayo 30, 2026 — Malipayong gisaulog sa tibook Arkidayosis sa Davao ang ika-16 nga Archdiocesan Marian Procession uban sa tema: “Mary, Our Lady of Peace, lead us to Jesus Christ, our Peace.” Ang maong kalihokan nagpundok sa daghang deboto ug mga matinud-anong Katoliko aron ipakita ang ilang dakong gugma ug debosyon kang Birhen Maria. Ang maong prusisyon gisalmotan usab sa parokya sa San Juan Pablo Segundo diin mao ang mga imahe sa “Our Lady of Czestochowa”, “Nuestra Senora de La Paz y Buen Viaje”, ug “Madonna de la Grazia”. Apil usab nga mitambong ang mga AJC Sisters nga sakop sa Parokya diin lakip niini mao ang “Our Lady of Grace”.

Sa alas 4:00 sa kaadlawon, nagsugod ang prusisyon sa gikan sa Parokya sa San Pablo, Juna Subdivision padulong sa San Pedro Cathedral. Bisan sayo pa sa buntag, daghang mga layko ug relihiyoso ang mitambong ug naglakaw uban sa pag-ampo ug hugot nga pagtuo, uban sa mga nagkalain laing Ministriya sa matag parokya, organisasyon, ug mga deboto sa Mahal nga Birhen Maria. Ang kahilom ug panaghiusa sa mga deboto nagpakita sa ilang lawom nga pagrespeto ug pagsalig sa Mahal nga Birhen. Ang mga imahe ni Maria nga gidala sa prosesyon naghatag og inspirasyon ug paglaum sa tanang nanambong.

Human sa prusisyon, misunod ang Santos nga Misa gipangulohan ni Rev. Msgr. Paul A. Cuison. Sa introduksyon sa Misa, gipaambit ni Msgr. Paul ang pagkaila sa mga Pilipino isip “Pueblo Amante de Maria” o “katawhang nahigugma kang Maria.” Sa iyang homiliya gidasig usab niya ang tanang magtutuo nga himuong ehemplo si Maria sa ilang kinabuhi ug itugyan kaniya ang ilang mga kabalaka, pag-ampo, ug pangandoy “Let us make Mary our home, let Mary dwell in our hearts”.

Sumala kaniya, pinaagi sa mahigugmaong pag-ampo ug pagpangamuyo ni Maria, madala ang tanang pangamuyo ngadto kang Hesukristo nga mao ang tinubdan sa tinuod nga kalinaw ug kaluwasan. Ug ang debosyon sa mga Pilipino ngadto kang Birhen Maria nagpabilin nga lig-on bisan sa daghang pagsulay nga giatubang sa kinabuhi. (Jonathan Paeldilan | SJPII SoCCom Coordinator)