Ang Ginoo Maayo ug Mapasayloon

Ika-16 nga Domingo sa Ordinaryong Panahon (July 19, 2026)
Wis 12:13, 16-19 / Ps 86:5-6, 9-10, 15-16 / Rom 8:26-27 / Mt 13:24-43

Tingali usahay mabati nato nga bisan sa atong pagtudlo sa atong mga anak sa maayong pamatasan, nganong aduna man gyuy mosimang. Bisan sa dugay na natong pagkadungog sa wali sa mga kaparian, nganong wala man gihapoy katul-id sa dagan sa katilingban o sosyodad.

Kini ang gipasabot sa Ebanghelyo nga diin ang Ginoo naghimo sa kalibotan nga maayo. Siya nagpakaylap sa iyang mga pulong ug maayong buhat. Apan usahay nahikatulog ug dili andam ang katawhan sa pagsubay sa iyang pagtulon-an mao nga motunhay ang buhat sa pagpakasala. Gitugotan sa Dios ang daotan apan sa kaulahian nga adlaw, sa Adlaw sa paghukom, motunhay ang kaangayan ug katarong. Anihon sa Dios ang mga maayo ug pasudlon sa iyang gingharian, apan ang mga dagami, ang mga nagbuhat sa kadaot silotan.

Mao nga sa ikaduhang pagbasa, giawhag kita nga gikinahanglan nato nga mosangpit kanunay sa Espiritu aron lig-onon kita panahon sa pagsulay ug tentasyon. Tudloan kita sa Espiritu unsaon pag-ampo, ang maayong relasyon ug pakigsuod sa Dios aron magmalig-on kita kon sulayon ug hasolon sa kalibotanon nga kahilayan ug kaharuhay. Sangpiton ug paminawon unta nato ang Espiritu diha sa matinud-anon natong pag-ampo matag adlaw aron mahimo nato ang kabubot-on sa Ginoo.

Walay laing Dios nga gamhanan panahon sa kakuyaw ug hulga sa kadaot. Ang Ginoo, diha sa unang pagbasa gilarawan nga mao ang tinubdan sa kaangayan ug hustisya. Siya magpakita sa iyang gahum ug kahingpitan. Malooy siya ug makapasaylo sa atong mga kahuyang. Siyay panig-ingnan ug ehemplo sa pagkamalumo sa kasing-kasing ug sa pagdawat sa mga mahuyang, sa mga makasasala, sa mga nagbuhat og daotan, sa mga nahisalaag.

Busa, dili unta kita maeskandalo sa presensiya sa kadaotan. Hinunoa, mosalig kita nga ang kadaotan anaa pa hangtod sa ting-ani. Ang Espiritu angay natong sangpiton kay Siya maoy molig-on kanato. Ug ang Dios nga gamahanan sa tanan ug maoy hustisya, malooy sa mga nahisalaag. Ang Ginoo maayo ug mapasayloon.