Kalampusan pinaagi sa gugma ug panaghiusa sa parokya

Malampuson ug malipayon nga gisaulog sa Our Mother of Perpetual Help (OMPH) Parish ang ika-54 nga Parokyal nga piyesta pinaagi sa nagkadaiyang kalihokan nga nagpalig-on sa pagtuo, panaghiusa, ug pag-alagad sa tibuok komunidad sa parokya.

Nasugdan ang kasaulogan pinaagi sa Youth Day: Festival of Dance ug Kasalan ng Bayan niadtong Hunyo 6. Kini nga mga kalihokan nagpakita sa aktibong partisipasyon sa mga kabatan-onan ug mga magtiayon sa parokya.

Gikan sa Hunyo 12 hangtod Hunyo 20, gipahigayon ang Novena Masses nga gipasiugdahan sa nagkadaiyang sona ug mga ministriya sa parokya. Kini nahimong panahon sa pag-ampo ug espirituhanong pagpangandam alang sa dakong kasaulogan sa pista. Gipahigayon sad ang Dawn Aurora niadtong Hunyo 20 sa alas 4 sa kadlawon . Kini giprocession ang mga Model Saints sa Redemptorist nga si Saint Clements, St Alphonsus de Ligouri, St. John Neumann, St. Gerard Majella ug ang ang Icon sa Inahan sa Kanunayng Panabang, human ana, gisundan dayon ang alas6 am nga misa ug ang sending forth sa tanan GSLs.

Niadtong Hunyo 21 sa alas 9:30 sa buntag, gipahigayon ang blessing sa St. Alphonsus Day Chapel. Gisundan kini sa Pontifical Mass sa alas 10:00 sa buntag nga gipangulohan ni Most Rev. Romulo G. Valles, D.D. ug gitambongan sa mga pari sa Congregation of Most Holy Redeemer(Redemptorists). Ang maong Misa nahimong usa ka dakong pagpasalamat sa mga grasya ug panalangin nga nadawat sa parokya sulod sa daghang katuigan.

Ang kinatumyan sa kasaulogan mao ang Fiesta Celebration Program nga adunay tema nga “Mary, One in Christ, Bearers of Peace and Mission.” Uban sa konsepto nga “Pista sa Nayon,” nagkatigom ang pito ka sona ug tanang ministriya sa parokya aron magpakita sa ilang panaghiusa, pagtinabangay ug kalipay isip usa ka komunidad sa pagtuo.

Nagsugod ang pagparehistro sa mga partisipante alas 4:00 sa hapon. Apan tungod sa kusog nga ulan ug hangin nga miigo sa maong takna, nalangan ang pagsugod sa programa. Tungod usab sa kakulang sa mga performers alang sa pipila ka presentasyon, gisugdan una ang panagtigom ug salo-salo sa mga parokyano.

Pormal nga giablihan ang programa pinaagi sa welcome address ni Rev. Fr Gary Alvarado CSsR ang Kura Paroko. Gisundan kini sa nagkadaiyang presentasyon nga giandam sa mga sona ug ministriya, nga nagpakita sa ilang mga talento, pagkamamugnaon ug aktibong pag-apil sa kinabuhi sa parokya.

Atol sa mga presentasyon, hinay-hinay usab nga giila ug gi-acknowledge ang presensya sa mga kaparian sa Redemptorist Community nga nakig-uban ug nakigsalo sa kalipay sa mga parokyano. Lakip kanila sila Rev. Fr. Sanito Jesus Umbac CSsR, Rev. Fr. Edilberto Cepe CSsR, Rev. Fr. Lemuel Nadorra CSsR, ug ni Rev. Fr. Leo Armada CSsR. nga maong naghatag ug Fiesta Message. Gitambongan usab sa halangdong Kura Paroko sa OMPH Parish, Rev. Fr. Gary Alvarado, CSsR ang maong selebrasyon, nga nagpakita sa ilang suporta ug pakig-ambit sa kinabuhi sa komunidad sa parokya. Ang ilang presensya nakadugang sa kahulugan sa maong kasaulogan ug nagpamatuod sa lig-on nga panaghiusa tali sa kaparian ug sa mga parokyanong ilang gi-alagaran.

Human sa tanang presentasyon, Gihuman ang programa pinaagi sa Closing Remarks ug Closing Prayer nga gipangulohan ni Mr. Edwin Pilapil, PSL Coordinator ug PPC President, diin iyang gipadayag ang pasalamat sa tanang sona, ministriya, mga boluntaryo, sponsors ug mga parokyano nga nakatampo sa kalampusan sa ika-54 nga Parokyal nga Pista.

Bisan pa sa hagit nga gidala sa dili maayong panahon, napakita sa mga parokyano sa OMPH Parish ang ilang lig-on nga pagtuo, panaghiusa ug kalipay sa pagsaulog sa pista. Ang maong kasaulogan nahimong timaan sa ilang padayon nga paglakaw isip usa ka komunidad nga nagdala sa kalinaw ug misyon ubos sa pag-amuma sa Mahal nga Inahan sa Kanunayng Panabang.

Viva Maria! Happy Fiesta OMPH!

(By Mary Grace Gonzales | OMPH SoCCom)