Labaw sa Tanan

Ika-17 nga Domingo sa Ordinaryong Panahon (July 26, 2026)
1 Kgs 3:5, 7-12 / Ps 119:57, 72, 76-77, 127-128, 129-130 / Rom 8:28-30 / Mt 13:44-52 or 13:44-46

Unsa kaha alang kanimo ang labaw sa tanan? Unsa bay nagdikta kanimo sa imong pagkinabuhi?

Sa Ebanghelyo, ang sambingay sa pagkaplag sa mahalon nga perlas maoy labaw sa tanan. Kining perlas mao ang paghari sa Dios. Andam kaba nga biyaan ang tanan kung nakaplagan mo ang kabilihon nga walay sama sa paghari sa Dios? Walay posisyon, tanyag nga sama sa maleta, ug bisan gahum ang makasapaw sa tawo nga kumbinsido nga ang paghari sa Dios maoy labaw sa tanan. Kung ang Dios naghari kaniya, siya dili manlimbong, ni mamintaha, ni mamakak. Buhaton lamang niya ang unsay ma kaayo sa isigkatawo.

Sa unang pagbasa, bisan si Solomon, wala nangandoy og kabtangan o kamatayon sa iyang mga kaaway. Sa dihang giingnan siya sa Dios unsay buot niyang pangayuon, siya mihangyo nga unta hatagan siyag kaalam. Labaw sa tabang butang, gahum, kasikat o impluwensiya, alang kaniya ang kaalam nga mao ang Dios maoy labing importante. Ang tawo nga maalamon makalahutay sa pagsulay ug magpuyo nga maalagaron sa kaharuhay. Dili siya moabuso kay ang kaalam mogiya sa maayong desisyon alang sa pag-uswag sa baga nga katilingban ug dili sa hinakog sa kaugalingon lamang nga gusto.

Sayod ang tawo nga gipalabi ang paghari sa Dios ug ang kaalam nga ang tanang butang gibuhat sa Dios alang sa kaayohan niadtong nahigugma kaniya. Labaw sa tanan alang kaniya ang paghigugma sa Dios. Palabihon niya nga siya mag-antos nga naay gugma sa Dios, kaysa haruhay apan wala gugma sa Dios. Labaw sa tanan alang kaniya ang iyang mga pulong, huna-huna ug buhat, gigiyahan ug gipaluyohan sa paghigugma niya sa Dios.

Busa, labaw unta sa tanan alang kanato ang paghigugma sa kasugoan sa Dios. Ang Salmo ato untang mabati sa pag-ingon, O Dios nahigugma ako sa imong mga sugo labaw sa tanan.