Pilgrimage of Hope: Walking with Mary toward a Deeper Encounter with Jesus Christ

Nagpahigayon og Marian Pilgrimage ang GSL ug ang Komunidad sa St. Joseph the Worker sa GKK Hillside, sakop sa Our Mother of Perpetual Help (OMPH) Parish, niadtong Hulyo 13, 2026, nga may temang “Pilgrimage of Hope: Walking with Mary toward a Deeper Encounter with Jesus Christ.”

Nagtigom ang mga partisipante alas 7:00 sa buntag sa St. Joseph the Worker Chapel alang sa orientation, commissioning, ug panagtigom sa wala pa gisugdan ang maong espirituhanong panaw.

Ang unang destinasyon sa grupo mao ang giila nga Our Lady of Catigan Shrine sa Catigan, Toril. Didto, mibisita sila sa shrine ug sa grotto ni Birhen Maria, nag-ampo sa Santo Rosaryo, namalandong sa Pulong sa Diyos, ug mitambong sa Balaan nga Misa.

Mipadayon ang pilgrimage sa Holy Spirit Adoration Convent (Pink Sisters) sa Talomo District, diin naggahin ang grupo og panahon alang sa Silent Adoration ug personal nga pag-ampo, samtang naghalad sa ilang mga intensyon ug pasalamat ngadto sa Ginoo.

Ang katapusang destinasyon mao ang Mary Mother of Mercy Shrine sa New Carmen, Magtuod. Didto mitambong ang mga pilgrim sa Healing Mass, maong panaw sa pagtuo ug pagpangayo sa grasya sa Diyos pinaagi sa pagpangamuyo ni Birhen Maria.

Natapos ang kalihokan pinaagi sa luwas nga pag-abot sa mga partisipante sa GKK Hillside alas 6:30 sa gabii. Sumala sa mga organizers, ang Marian Pilgrimage dili lamang usa ka pagbisita sa mga balaang dapit kondili usa usab ka higayon sa pagpamalandong, pag-ampo, ug paglig-on sa paglaum isip mga Kristohanon nga naglakaw uban kang Maria padulong sa mas lawom nga pagpakigkita kang Hesukristo. (Mary Grace Gonzales – OMPH SoCCom)