Sa Kalisod ug Kapait ang Dios Nagapakaon

Ika-18 nga Domingo sa Ordinaryong Panahon (August 2, 2026)
Is 55:1-3 / Ps 145:8-9, 15-16, 17-18 / Rom 8:35, 37-39 / Mt 14:13-21

Natabangan ka ba sa dihang miduol ka kang Jesus sa panahon sa kagutom ug kauhaw? Natubag ba ang imong panginahanglan sa imong pagsalig sa Ginoo panahon sa kalisod ug kapait?

Sa unang pagbasa, gidapit kita ni Propeta Isaias sa pagduol sa Dios. Kadtong mga giuhaw ug gigutom nga walay ikabayad, sa Dios pagatagbawon. Sila hatagan sa ilang gikinahanglan bisan walay kwarta kay ang Dios mao man ang tinubdan ug tag-iya sa tanan. Apan kinahanglan nga mamati sila sa tingog sa Ginoo. Kinahanglang sa tinuoray mamalandongbug mag-ampo aron matuman ug mapuy-an ang iyang pulong. Aduna ka bay higayon sa pagbasa o pagpaminaw iyang tingog diha sa Bibliya? Nagasimba ka ba ug namati pag-ayo sa mga pagbasa?

Wala gayoy makapahimulag kanato gikan sa gugma ni Kristo. Gisaysay sa ikaduhang pagbasa nga walay kasakit, kalisdanan, kagutom, o pagpanglutos nga makapahilayo kanato sa Ginoo. Hinunoa, kini mahimong kahigayonan aron kita mobati nga kita angayan nga moduol ug mamati sa Ginoo sa panahon nga sama niini nga kita kaniya nanginahanglan. Mao kini ang mga higayon nga moluhod kita atubangan niya, mosalig kaniya ug molihok uban sa iyang grasya nga makapalingkawas kanato sa mga pagsulay. Sa imong kinabuhi nahimo ka bang duol ug suod sa Ginoo sa mga panahon sa kagutom, kakabos, ug kalisdanan? Nagpalaban ka ba kaniya sa panahon sa paglutos?

Dili gayod tugotan sa Ginoo nga kita magutman, o makuyapan sa panaw sa kalisod. Dili buot sa Dios nga wala kitay makaon o madawat nga panabang sa panahon sa kalisdanan. Mao nga sa Ebanghelyo, samtang mitambag kaniya ang iyang mga tinun-an nga palakton na ang mga tawo nga nagsunod-sunod kaniya kay nagkangitngit na ug layo ang ilang nahimutangan, siya mismo miingon nga dili kinahanglan nga ang mga tawo mao pay magkapuliki sa pagpangitag ilang makaon. Sila na mismo, ang mga tinun-an, matud sa Ginoo, maoy maghatag kanilag pagkaon. Kining Ebanghelyo atong masinati sa pag-antus sa usa ka ginikanan sa pag-atiman niya sa iyang mga anak, sa paghatag sa usa ka agalon sa hustong suhol ngadto sa iyang mga trabahante, sa usa opisyal sa panggamhanan o pribado man sa patan-aw nga ang iyang katawhan mapangitaan og paagi aron mahaw-as sa kalisod. Apan kinahanglan nga bisan unsa ka gamay sa unsay anaa atong pasalamatan ug madaginuton nga hiposon ug maampingan. Dili unta nato usikan bisan ka gamay nga salin sa matag nadawat nato nga grasya. Nakatabang ka ba nga adunay makaon ang mga kabos nimong isigkaingon?

Busa, duol kang Jesus, pamati sa Dios, salig sa iyang grasya, pagdaginot aron mas mabulahan ka bisan kalisod. Hinumdomi ang Salmo, ang Ginoo nagapakaon, andam siya nga mo tubag sa atong panginahanglan.