Tawag sa Pangpangalagad: Wala Mag-Agad sa Kahimtang, Kahibalo ug Kapasidad

Kaniadtong, Hulyo 19, 2026, uban sa dakong kalipay ug pagpasalamat sa Ginoo, nasaksihan ang pagpadala sa atong napulog tulo (13) ka School Catechists ngadto sa nagkalain-laing mga tulunghaan nga sakop sa atong parokya, San Pedro Cathedral Parish, aron ipadayon ang ilang halangdong misyon sa pagpanudlo sa pagtuo.

Dinhi nato makita nga ang tinuod nga pagpangalagad, wala mag-agad sa atong kahimtang, kahibalo, o kapasidad, kondili sa atong andam nga kasingkasing sa pagtubag sa tawag sa Ginoo ug sa matinud-anong pagpaambit sa Iyang Pulong. Pinaagi sa ilang ministeryo, daghang kabataan ang makakat-on sa mga pagtulon-an sa Simbahan ug mas mapaduol sa pag-ila, paghigugma, ug pagsunod sa atong Ginoong Hesukristo.

Sumala sa gipaambit ni Msgr. Paul A. Cuison, Rector sa parokya, ang giingon sa Ginoo nagpabiling tinuod hangtod karon: “Daghan ang anihonon, apan gamay ra ang mga mangangani.” Daghan ang mga kasingkasing nga andam sa pagdawat sa Pulong sa Diyos, apan nagkinahanglan kini og matinud-anong mga magpupugas aron ang maayong binhi dili madaot sa “mga sagbot” sa kalibutan.

Busa, hinaut nga ang mga School Catechists inubanan sa Formation Sister In-charge nga si Sr. Lucy Marie Atuel, OSB magmalahutayon sa ilang pagpangalagad. Unta ang matag binhi sa pagtuo nga ilang itanom sa mga eskwelahan motubo, molig-on, ug mamunga diha sa kinabuhi sa atong mga kabataan, aron sila mahimong mga Kristohanong adunay lig-on nga pagtuo, maayong pamatasan, ug gugma alang sa Diyos ug sa isigkatawo.

Ang tinuod nga katekista dili lamang magtudlo pinaagi sa mga pulong, kondili labi na pinaagi sa maayong ehemplo sa kinabuhi. Ang ilang pagpangalagad usa ka matinud-anong pagtubag sa tawag sa Ginoo nga mahimong mga saksi sa Ebanghelyo ug mga instrumento sa Iyang gugma. Dili nato hikalimtan ang mga ginikan mauy unang magtutudlo sa atong mga kabataan.

“Ang Ginoo mao ang magpatubo sa binhi nga inyong gipugas; busa dili unta kita mapul-an sa pagbuhat og maayo, kay sa hustong panahon makaani kita ug unta dili kita moundang.” (Rosalinda Jabonillo)