Tulo ka gabiing Catholic Doctrine Seminar gipahigayon sa HFP Baliok

Baliok, Davao City – Malampuson nga gipahigayon sa Holy Family Parish ang tulo ka gabii nga Seminar sa Doktrina sa Simbahang Katolika niadtong Hunyo 25–27, 2026 sa Parish Pavilion, nga gitambungan sa mga parokyano gikan sa Dumoy ug Baliok.

Ang maong seminar gipangunahan sa mga tinahod nga mamumulong gikan sa Catholic Faith Defenders, usa ka grupo nga nag-alagad sa pagpalawom sa pagsabot sa Katolikong pagtuo pinaagi sa pagpatin-aw sa mga pagtulon-an sa Simbahan pinasikad sa Balaan nga Kasulatan, Sagradong Tradisyon, ug Magisterium sa Simbahan.

Sa unang gabii, gipangunahan ni Bro. Danilo “Kapilyano” ang hisgutanan mahitungod sa Ecclesiology o ang pagtuon bahin sa Simbahan. Gipatin-aw niya nga ang Simbahan dili lamang usa ka organisasyon o tinukod, kondili mao ang Lawas ni Kristo, gitukod mismo ni Hesukristo aron mahimong sakramento sa kaluwasan ug magpadayon sa Iyang misyon sa pagwali sa Maayong Balita. Giduso usab niya nga ang mga tumutuo mahimong aktibong kabahin sa kinabuhi ug misyon sa Simbahan pinaagi sa pag-alagad, pag-ampo, ug matinud-anong pagpuyo sa ilang pagtuo.

Sa ikaduhang gabii, gihatagan og lawom nga pagpasabot ni Bro. John Diona ang mahitungod sa Sagradong Tradisyon. Iyang gipakita nga ang Sagradong Tradisyon usa sa mga tinubdan sa Kristohanong pagtuo nga gipasa gikan sa mga Apostoles ug nagpadayon pinaagi sa Simbahan uban sa Balaang Kasulatan. Gipatin-aw usab niya ang kalainan tali sa tinuod nga mga tradisyong Kristohanon ug sa pipila ka mga pamatasan o pagtuo nga adunay kagikan sa lokal nga kultura o dili kabahin sa opisyal nga pagtulon-an sa Simbahan. Ang maong paghisgot nakatabang sa mga partisipante sa mas lawom nga pagsabot sa pundasyon sa ilang pagtuo.

Sa katapusang gabii, gihisgutan ni Bro. Jet Garcia ang papel sa Mahal nga Birhen Maria sa kinabuhi sa Simbahan. Gipasabot niya nga si Maria mao ang inahan ni Hesus ug giila usab isip Inahan sa Simbahan, nga usa ka ehemplo sa hingpit nga pagtoo, pagkamasinugtanon, ug pag-alagad sa kabubut-on sa Diyos. Gipasabot usab nga ang taas nga pagpasidungog nga gihatag sa mga Katoliko kang Maria dili pagsimba kaniya, kondili usa ka pagpasidungog isip inahan sa Manluluwas ug matinud-anong disipulo ni Kristo nga nagdala sa mga tumutuo ngadto sa iyang Anak.

Human sa matag sesyon, adunay higayon alang sa mga pangutana ug mga klaripikasyon gikan sa mga partisipante. Ang mga pangutana gitubag sa mga mamumulong pinaagi sa mga pagtulon-an sa Magisterium sa Simbahan, Balaan nga Kasulatan, ug Sagradong Tradisyon, nga nakatabang sa paghatag og mas lawom ug mas tin-aw nga pagsabot sa mga hilisgutan.

Sumala sa mga organisador, ang nagkataas nga ihap sa mga mitambong matag gabii nagpakita sa dakong interes ug tinguha sa mga parokyano sa Dumoy ug Baliok nga mas mapalawom ang ilang kahibalo sa Katolikong pagtuo ug mapalig-on ang ilang espirituhanong kinabuhi.

Sa pagtapos sa seminar, mipasalamat si Rev. Fr. Dionisio Tabiliran, DCD, Parish Priest sa Holy Family Parish, uban sa Parish Formation Team, sa tanang mitambong ug sa mga mamumulong nga nipaambit sa ilang kahibalo. Gipadayag usab niya ang iyang paglaum nga kini nga kalihukan mahimong sinugdanan sa mas lawom nga pagtuon sa pagtuo ug sa padayon nga pagporma sa mga binunyagan isip matinud-anong mga sumusunod ni Kristo ug aktibong mga sakop sa Simbahan. (Flor Arellano- Deloria | SoCCom, Holy Family Parish)