Ang Dios angay natong simbahon nga tanan

Ika-20 nga Domingo sa Ordinaryong Panahon (August 16, 2026)
Isaiah 56:1, 6-7 / Psalm 67:2-3, 5, 6, 8 / Romans 11:13-15, 29-32 / Matthew 15:21-28

Usahay dunay moabot kanato ug duna usab mawala, dunay moabot ug dunay mobiya, ma butang man kana o tawo. Kung dunay mobalik mas maayo. Kung dunay mawala paningkamotan nga makabalik.

Mao kini ang kaabli sa Ginoo niadtong mga nagtoo kaniya: ang pagbuhat sa sakto aron magpabilin kaniya. Ang mga nahilayo ug wala motuo kaniya iyang dapiton aron mahiusa kaniya. Kini nadungog nato sa unang pagbasa.

Ang Ginoo, pinaagi kang San Pablo diha sa ikaduhang pagbasa, nagmalumo ug nagpasaylo sa mga gahig ulo. Siya mo pabalik niadtong nahisalaag. Nagapakita siyag kalooy sa mga moduol kaniya ug moduol siya sa mga nahilayo.

Tulo ka hagit ang atong nadungog sa Ebanghelyo aron mapuy-an kining tawag sa Ginoo aron kita mahiusa sa pagdayeg kaniya sa iyang kalooy, pagbalik diha kaniya. Una, ang mga tinun-an gitudloan ni Jesus nga diha sa ilang kinaiya sa pagpahawa sa sabaan nga babaye ila untang maamguhan nga diha sa mga nagkinahanglan anaa ang Ginoo. Gipasabot ni Jesus sa iyang buhat nga way disturbo ang sa maayong Kristiyano kung siya nakakita sa Dios diha sa mga nagpakiluoy. Ikaw andam ba nga madisturbo niadtong ubos sa katilingban sa panahon nga sila modangop kanimo? Ikaduha, walay dili natubag sa Ginoo kung magmapaubsanon ug mosalig kita kaniya. Wala gibati sa babaye nga siya sinalikway o gamay o walay dungog bisan paman miagi siya nga daw gisalikway. Hinunoa, miinsister siya ug mipadayon sa iyang hangyo ug misalig nga bisan mumho lang, bisan gamay lang nga grasya magpasalamaton ba siya. Mao nga gihatag ni Jesus ang iyang gipangayo. Ug ikatulo, gipakita ni Jesus nga iyang kaluoy ug kaayo nagkinahanglan sa atong tulobagon ug responsibilidad sa pagpaningkamot nga mosangpit kaniya. Si Jesus andam sa usa ka diyalogo aron dili kita magpaabot lamang, kondili aktibo nga mohimo sa atong paglambo sa pakigsuod kaniya. Sa atong mga pag-ampo mahimo nga mopresentar kita kaniya nga puno sa pagpaubos ug pagsalig sa atong mga argumento kay mamati siya. Buot niya nga motubo kita pinaagi sa diyalogo diha sa pag-ila sa iyang kaayo ug kaaghop.

Busa, sa kadisturbo himamaton ta ang Ginoo, mosalig kita nga mapaubsanon, makipagdiyalogo kita aron mahimo kita nga iyang tanan nga nasod nga nagsimba kaniya.