Apohan nga Hulagway sa Gugma sa Bokasyon ug Katilingban

Sa Zone 6 sa Mother of Perpetual Help – 9 GKK sakop sa Ascencion of the Lord Parish, usa ka hulagway sa gugma ug pagtuo ang makita sa kinabuhi ni nanay Clarita Pelegrino, 75 anyos ug kasamtangan nga Zone 6 Coordinator. Si nanay Clarita usa ka inahan nga adunay lima ka anak, nagpuyo sa yano nga panginabuhi. Matod pa niya wala sila gipasagdan sa Ginoo, ug kini mao’y naghatag kaniya og kusog sa daghang katuigan sa pag-pangalagad.

Sulod sa kap-atan ug duha ka tuig nagsugod siya isip Chapel Catechist sa San Pedro Cathedral, dayon nahimong Pangulo sa Alagad (PSA), nagserbisyo siya sa beinte ka tuig nga nahimong Pangulo sa Katilingban (PSK) sa Mother of Perpetual Help – 9 sa sakop sa Ascencion of the Lord Parish (GSIS). Ang iyang kadasig gikan sa dakong gugma sa katilingban ug sa paghatag og maayong pagtulon-an kabahin sa simbahan. “Lipay ko nga nakatabang sa paghatag og maayong ehemplo ngadto sa uban, ug sa pagsangyaw sa Pulong sa Ginoo uban sa buhat,” iyang giingon. Ang pagpangalagad dili sayon. Daghang sakripisyo ug pagsulay ang iyang giatubang, apan uban sa dakong pagtuo ug pagsalig sa Ginoo, iyang nasinati nga walay imposible sa Dios. Sa iyang pamilya, nakasinati usab siya og mga problema, apan pinaagi sa pagsinabtanay, pagpaminaw, ug gugma, ilang nasabtan nga ang Ginoo kanunay nag-uban kanila.

Sulod sa daghang katuigan, si nanay Clarita nahimong foster parent sa mga seminarista sa REMASE, diin daghan ang nakasinati og exposure sa ilang GKK ug karon mga pari na ang kadaghanan. Nahinumdom siya kanila, lakip na si Fr. Jojo Ortiz ug Fr. Vicney Jalico. Ang iyang panimalay nahimong abli nga pultahan alang sa mga seminarista ug kabatan-onan nga nagserbisyo sa simbahan, lakip na ang iyang mga apo nga youth steward ug sakop sa liturgical committee. Usa pa ka apo ang kasamtangan nga seminarista sa Propaedeutic year seminary.

Sa akong kaugalingong kasinatian isip usa ka seminarista, nakasinati usab ko sa iyang pag-atiman ug paggiya sa panahon sa akong Configuration Year 2 summer GKK exposure. Nasinati ko kung giunsa niya pag-amping ang bokasyon sa pagkapari ug pag hatag og bili sa gasa sa pag-alagad sa Simbahan. Giatiman ko niya sama sa usa ka anak, gigiyahan ko sa daghang aspeto sa kinabuhi ug sa pag-alagad, ug gibati nako nga usa ko sa iyang kaugalingong pamilya. Hangtod karon, nagapadayon ang among komunikasyon kanunay siya mangumusta sa akong kahimtang sa seminaryo sama sa usa ka inahan nga puno sa gugma ug pag-atiman.

Ang kinabuhi ni nanay Clarita usa ka inspirasyon sa paghigugma sa bokasyon ug pag-alagad. Ang iyang malipayon ug malahutayon nga pagserbisyo nagpamatuod nga ang tinuod nga kalipay makita sa paghatag sa kaugalingon alang sa Ginoo ug sa katilingban. Sa iyang gugma ug pagtuo, si nanay Clarita nahimong hulagway sa Dios sa paghigugma sa bokasyon sa pagkapari. (Sem. Arjo Neil Bondalo)