Asembliya ug Pormasyon sa mga GSLs sa HFP Gipahigayon

Niadtong Agosto 9 ug Agosto 23, malampusong gipahigayon sa Holy Family Parish ang Asembliya ug Pormasyon sa mga GKK Servant Leaders. Gitambongan kini sa mga lider gikan sa Zones 1–4 niadtong Agosto 9 ug Zones 5–7 niadtong Agosto 23. Pinaagi sa pagpanguna sa mga Ministry Coordinators, gihimo ang re-orientation sa mga tahas ug katungdanan sa matag ministriya sumala sa mga GKK Norms and Guidelines sa Arkidiyosesis sa Davao aron mas masabtan ug mapalig-on ang ilang pag-alagad sa simbahan ug komunidad.

Usa sa mga mahinungdanong bahin sa maong panagtigom mao ang Open Forum, diin gihatagan og kahigayonan ang mga partisipante sa pagpangutana ug pagpangayo og mga klaripikasyon mahitungod sa ilang mga responsibilidad ug ministeryal nga buluhaton. Ang maong kalihukan gipasiugdahan usab sa presensya ug pagdasig ni Rev. Fr. Dionisio C. Tabiliran, DCD, Kura Paroko, kinsa nagpasiugda sa kamahinungdanon sa paghiusa ug matinud-anong pag-alagad isip mga lider sa Kristohanong Katilingban.

Naglaum ang parokya nga pinaagi niini nga pormasyon ug dayalogo, mas mapalig-on ang pasalig sa mga servant leaders sa ilang misyon ug ministriya. Hinaut nga kini nga panagtapok mahimong tinubdan sa inspirasyon ug panaghiusa aron mapadayon ang epektibo ug matinud-anong pag-alagad alang sa kaayuhan sa parokya ug sa tibuok komunidad, samtang nagtinabangay sa pagtukod sa mas lig-on ug mas buhing Simbahan. (Flor Arellano-Deloria)