Pamati ug ayaw patig-aha ang inyong kasing-kasing

Ika-23 nga Domingo sa Ordinaryong Panahon (September 6, 2026)
Ez 33:7-9 / Ps 95:1-2, 6-7, 8-9 / Rom 13:8-10 / Mt 18:15-20

Sa milabay nga Domingo namalandong kita nga kung nasabtan nato ang atong bunyag, andam kita nga moapas-an sa atong krus, magdilaab kita sa pagsangyaw sa Pulong, ug dili kita magpahiuyon niining kalibotan. Karong Domingoha, gipahimangnuan kita unsay atong papel isip mga miyembro sa Simbahan tungod sa atong bunyag.

Sa Ebanghelyo karon, gihagit kita nga maningkamot nga walay mahimulag sa lawas ni Kristo bisan kinsa kanato. Kung may makasala, ang tumong nganong ipakita nato kaniya nga siya nakasala dili tungod kay ipabati nato nga siya nakapasakit kanato, kondili aron dili siya masakitan sa sangpotanan sa iyang gibuhat nga sala, aron dili siya mag-antos nga mahimulag tungod sa iyang sala. Ang tumong sa pagsulti nga siya nakasala dili ang pagpakaulaw kaniya, kondili ang pagkabig kaniya balik sa katilingban sa mga gitawag sa Ginoo. Dili tumong nato nga siya isalikway, kondili nga siya mahibalik sa pundok sa mga gitigom sa Dios. Busa dili angay nga pakaulawan sa kadaghanan o sa social media ang nakasala, bisan paman kung dili siya mamati, kay si Kristo wala man magsalikway sa mga wala modawat kaniya, kondili iya sila nga giubanan ug gisabot sa ilang lahi nga baruganan ug kahimtang.

Mao gani nga sa ikaduhang pagbasa gisilsil ni San Pablo sa mga taga Roma nga ang gugma dili makahimog dautan sa isigkatawo. Angayan bation sa magtotoo nga iyang utang ang paghigugma sa isigkaingon. Kung ikaw dunay gugma, ang imong matag buhat dili modaot o moduot sa uban bisan sa iyang pagkalahi o pagkagahig ulo, kondili anaa ang paningkamot nga siya makaamgo ug mabag-o. Ang pagpasensya ug pagpaubos maoy pagpadayag sa gugma nga naglantaw alang sa kaayo sa isigkatawo. Ang gugma magtukmod sa pagpabangon sa mga napukan sa sala, sa pagpabalik sa nahisalaag, sa pagpaamgo sa mga walay pagtagad kung unsay maayo.

Hinumdoman nato nga sama sa awhag sa unang pagbasa, ang pagpasidaan maoy gisangon kanato nga tulubagon nato, ug dili gani nga aron matagad sa nakasala ang atong pagpasidaan. Ang gisangon sa Ginoo sa magtotoo mao ang pagpasidaan sa nakasala aron dili siya mamatay. Kon dili nato pasidan-an ang nakasala, paninglan kita sa Dios sa atong pagpabaya. Apan kon dili magtagad ang nakasala sa pasidaan, dili na kini tulubagon sa magtotoo. Himoon lamang nato isip magtotoo ang pagkumbinse sa pagbag-o. Kung ang nakasala motubag o dili sa maong pasidaan, iya na kana sa Ginoo ug tulubagon na kana sa nakasala.

Busa, sa mga magtotoo nga nakakita sa sala ug sa mga nabuta tungod sa ilang sala, angayan lamang nga mamati kanunay sa tawag sa pagkakatilingban sa Simbahan. Ang Salmo balunon nato nga nagkanayon: kung karon makadungog kamo sa iyang tingog, ayaw patig-aha ang inyong kasing-kasing.