“Sa Gugma, Nagkahiusa; Sa Kalinaw, Namunga”

Niadtong Agosto 1, 2026, puno sa pag-ampo ug pagtuo, malipayong gisaulog sa San Alfonso Maria de Liguori Parish sa Mandug ang ika-24 nga Parochial Fiesta uban sa temang “Uban ni San Alfonso: Gugma ang Giya, Kalinaw ang Bunga.”

Isip usa ka Parokya, gipadayag sa mga parokyano ang ilang pagmahal sa maong patron – San Alfonso Maria de Liguori.

Uban sa iyang kadasig ug panalangin, nagkahiusa ang mga tumutuo, mga deboto, ug mga bisita gikan sa nagkalain-laing Gagmayng Kristohanong Katilingban (GKK) aron makig-ambit niining mahinungdanong kasaulogan.

Gipangulohan ni Most Rev. Romulo G. Valles, D.D., ang halangdong Arsobispo sa Dabaw, ang Pontifical Mass, sa alas nuebe ang takna sa buntag, sa susamang adlaw, isip sentro sa maong kapistahan. Kauban niya sa pagsaulog sila Rev. Fr. Severino A. Capulong Jr., Kura Paroko, ug Rev. Fr. Oliver Ganas, Parochial Vicar, uban sa ubang mga pari sa Arkidiyosesis sa Dabaw nga nakighiusa sa Santos nga Misa.

Sa wala pa natapos ang Santos nga Misa, gipadayag ni Fr. Severino ang iyang kinasingkasing nga pasalamat sa tanang mitambong, ilabina sa mga parokyano nga kanunay nagasuporta sa Parokya sa mga panginahanglan niini.

Matod pa kaniya, ang presensya sa mga tumutuo, deboto, ug mga bisita usa ka lig-on nga pagpamatuod sa ilang nagpadayon nga pagtuo, panaghiusa, ug gugma ngadto kang San Alfonso Maria de Liguori, ang patron sa parokya.

Human sa Misa, mipadayon ang kalipay pinaagi sa mga maanindot nga pasundayag sa mga estudyante gikan sa nagkalain-laing eskwelahan sa Barangay Mandug. Modern dance ug cultural dance ang giandam sa mga performers nga nakapadugang sa kalingaw sa adlawng kapistahan.

Gisundan kini sa panag-ambitay sa pagkaon nga giandam sa mga Gagmay’ng Kristohanong Katilingban (GKK) Servant Leaders ug members.

Nagtigom ang mga pamilya, higala, mga kabatan-onan, mga Servant Leaders, GKK members, ug mga bisita sa matag area (Callawa Area, Upper Mandug Area, Lower Mandug Area and DDF Area).

Human sa paniudto, gipahigayon ang makalingaw nga mga Parlor Games nga gifacilitate sa Parish SoCCom Ministry. Puno sa kalipay ang mga GKK Servant Leaders ug members, malipayon nga gibitbit ang ilang mga premyo.

Sa hapon, gipadayon ang selebrasyon pinaagi sa usa ka basketball game tali sa Davao Clergy ug mga kapulisan (PNP Mandug). Sa matag tira, pasa, ug depensa, ilang gipakita dili lamang ang kahanas sa dula, kondili usab ang panaghigalaay. Mainiton usab kining gisuportahan sa mga parokyano nga nagtan-aw.

Sa pagsalop sa adlaw, nagtigom pag-usab ang pipila ka mga parokyano , Servant Leaders, GKK members and Parish Staffs kauban ang pipila ka mga bisita alang sa usa ka malipayong panihapon. Uban sa pagkaon ug maanindot nga panag-istoryahanay, mas napalig-on ang panaghiusa ug panaghigalaay sa matag usa.

Sa kinatibuk-an, ang ika-24 nga Parochial Fiesta sa San Alfonso Maria de Liguori Parish nahimong labaw pa sa usa ka yano nga pagsaulog sa kapistahan sa patron. Nahimo kini nga usa ka buhing pagpamatuod sa pagtuo, gugma, ug panaghiusa sa komunidad – usa ka tinuod nga pagsubay sa tema nga “Uban ni San Alfonso: Gugma ang Giya, Kalinaw ang Bunga.” (San Alfonso Parish SoCCom Ministry Writers Circle – Khoudy Albert)