Sinatia Ang Kaayo Ug Kaluwasan Sa Ginoo

Ika-19 nga Domingo sa Ordinaryong Panahon (August 9, 2026)
1 Kgs 19:9, 11-13 / Ps 85:9, 10, 11-12, 13-14 / Rom 9:1-5 / Mt 14:22-33

Nagasangpit ka ba alang sa kaayo sa Ginoo ug sa iyang kaluwasan? Kanus-a mo ba nasinati ang iyang tubag sa imong pagsangpit?

Sa unang pagbasa, si Propeta Elias gipasinati sa kaayo ug kaluwasan sa Ginoo sa iyang kahimtang sa kakapoy ug kaluya. Isip usa ka propeta nga gibiyaan sa tanan ug gani nakapangandoy nga mamatay na unta siya, gidapit siya sa Ginoo didto sa langub aron sa malumpong tingog mabati niya ang Ginoo. Ang Dios masinati nato dili sa daghan natong mga buluhaton o higala, o sa kabibo sa kalibotan, kondili sa kahilom sa langub sa atong kasing-kasing. Mogahin unta kita sa kahilom matag adlaw aron aron madunggan nato siya.

Sa ikaduhang pagbasa, si San Pablo gipasinati sa kaayo ug kaluwasan sa Ginoo. Taliwala sa iyang hilabihang kasubo ug walay hunong nga kaguol alang sa iyang mga kaigsuonan. Sa iyang kahimtang sa kasubo ug kaguol, nahimo siyang mapaubsanon nga midawat sa pagkulang sa iyang kaliwatan, ug miangkon siya unsa ka gamhanan ang Dios nga Manlukuwas sa tanan. Diha sa atong mga kasubo ug kaguol ang Dios mohupay kanato. Sa atong pagkaamgo sa pagkulang nato isip katawhan nga gilabanan sa Ginoo, sa atong kinasing-kasing nga pagdawat sa atong angay pang maayo unta nga mahimo, ang Dios magluwas kanato. Ang iyang kaayo atong masinati diha sa atong mga kaguol ug kasubo.

Sa Ebanghelyo, ang Ginoo mipasinati ngadto sa iyang mga tinun-an ug sa baga nga panon sa katawhan sa ilang kasinatian sa kagutom ug kalisod. Siya mismo miingon sa iyang mga tinun-an nga dili kinahanglan nga ang mga tawo pa maoy manglakaw aron mangita og ilang makaon. Sila mismo maoy mopakaon kanila. Ug tuod man, sa milagro sa pagpadaghan sa pan, gibusog ni Jesus ang daghang katawhan. Diha diay sa kagutom ug kalisod, sa panahon nga abli kita sa pagpasalamat sa bisan unsay diyotay nga ania kanato, sa pagkaabli sa pagpaambit niini, nga masinati nato Siya. Iyang ipakita diha nga ang diyotay nga ania kanato mahimo niya nga padaghanon aron maigo alang sa tanan. Ang Ginoo mas masinati nato sa panahon sa kagutom, kalisod ug kakulang. Siya magbusogbug magtagbaw kanato.

Busa, sination ta ang Ginoo diha sa kahilom, kasubo ug kagutom. Mosangpit kita sa iyang kaayo ug kaluwasan sa pag-ingon, Ginoo, makita unta namo ang imong kaayo ug maluwas kami.