Tinuig nga Pagpasalamat sa mga Grasya ug Maayong Ani

Samtang ang tibuok Dakbayan sa Davao nagsaulog sa tinuig nga Kadayawan Festival, usa ka selebrasyon nga naghatag og dakong bili sa gasa sa maayong ani ug mga panalangin sa yuta, usa usab ka susamang espiritu sa pagpasalamat ang makita sa kabukiran sa Malabog. Sa San Roque Parish, ang tinuig nga pista dili lamang panahon sa pagpasidungog sa ilang patron, kundili usa usab ka higayon sa paghalad sa mga bunga sa paningkamot sa mga parokyano gikan sa ilang mga uma. Karong Agosto 16, 2026, sa ilang 42nd Parochial Fiesta, ilang pasidunggan si San Roque ubos sa tema nga “San Roque: Panig-ingnan sa Paglaum nga Naglamdag, Pagtuo nga Nagpalig-on, Gugma nga Naghiusa.”

Isip usa ka parokya nga nahimutang sa kabukiran, suod kaayo sa mga katawhan sa San Roque ang kinabuhi nga nakagamot sa pag-uma. Matag tuig, nahimo nang tradisyon sa nagkalain-laing GSL o Sona ang pagdala sa mga abot gikan sa ilang uma isip halad sa panahon sa pista. Mga gulay, lagotmon, prutas, ug uban pang produkto sa uma mahimong simbolo sa ilang pagpasalamat sa Ginoo alang sa ani ug sa grasya nga ilang nadawat. Sumala sa SocCom Head sa parokya nga si Ms. Arlene Tarnate, “Kabahin sa among Fiesta matag GSL o Sona naa na i-andam ang paghalad sa mga abot gikan sa ilang uma. Bisan sa kalayo sa lugar o bukid sa matag Sona naa jud ang pagpaningkamot nga makapasalamat panahon sa kapistahan sa among Patron Sr. San Roque.”

Ang maong tradisyon nagsubay pa sa panahon sa ilang kanhing kura paroko nga si Rev. Fr. Jemasol Ortiz ug padayon nga gipreserbar sa komunidad hangtod karon. Aron mas mapalambo kini, nasabutan sa Parish Pastoral Council (PPC) ug Parish Finance Council (PFC), uban sa pagtugot sa kasamtangang kura paroko nga si Rev. Fr. Amado B. Arroyo, nga himoon kining mas mamugnaon matag tuig. Gikan niini, natawo ang Arko Contest, diin ang matag Sona maghimo og ilang kaugalingong arko ug ipakita niini ang mga abot gikan sa ilang mga uma. Pinaagi niini, dili lamang ang ilang pagkamamugnaon ang makita, kundili usab ang kadagaya sa ilang komunidad ug ang paningkamot sa mga mag-uuma.

Adunay dakong pagkasama ang tradisyon sa San Roque Parish sa diwa sa Kadayawan sa Davao og kini nga ang pagtan-aw sa ani dili lamang isip bunga sa paghago, kondili isip panalangin nga angay pasalamatan. Apan sa San Roque Parish ang kadagaya sa yuta mahimong mas personal tungod kay kini kabahin sa adlaw-adlaw nga kinabuhi sa mga pamilya sa kabukiran. Ang matag gulay ug prutas nga ilang gidala nagdala sa istorya sa pagpaningkamot, paglaum, ug pagtuo.

Sa ilang ika-42 nga pista, ang mga katawhan sa San Roque dili lamang nagsaulog sa ilang patron nga si San Roque. Ilang gisaulog ang kinabuhi sa komunidad, ang paningkamot sa mga mag-uuma, ug ang grasya nga nagpadayon sa pagbuhi kanila. Sa tunga-tunga sa kadagaya nga gisaulog sa Kadayawan, ang San Roque Parish nagpadayon sa pagpahinumdom nga ang ani usa ka panalangin, ang paghalad usa ka pagpasalamat, ug nga ang pista usa ka higayon sa pagpaambit sa gasa nga unang gihatag sa Ginoo. (Bernadette Esperance)