Urban Gardening Gisugdan sa Holy Family Parish

Dili kinahanglan ug halapad nga yuta aron makatanom, makaani, ug makatabang sa pamilya. Pinaagi sa gamay nga luna, gamay nga paningkamot, ug maayong pagkamamugnaon, mahimo nang magsugod ang usa ka tanaman nga mahimong tinubdan sa pagkaon, kahimsog, ug dugang nga panginabuhian.

Kini ang mensahe nga gipasiugda atol sa Orientation and Training with Actual Demonstration on Urban Gardening Using Composting Method nga gipahigayon sa Parish Desk for Care and Creation sa Holy Family Parish, Baliok, Davao City niadtong Agosto 15, 2026.

Ang maong kalihukan nagtumong sa pagtudlo sa mga partisipante sa praktikal ug yano nga paagi sa urban gardening, ilabina alang sa mga panimalay nga limitado ang luna. Gipakita nga bisan ang gagmay nga espasyo mahimong mahimong mapuslanon pinaagi sa paggamit sa mga paso, bakanteng botelya sa tubig, recyclable containers, daang mga bag ug sako isip mga sudlanan sa pagtanom.

Ang programa unang ipatuman sa mga bakanteng luna sulod sa parokya isip konkretong ehemplo sa pag-atiman sa binuhat sa Diyos. Human niini, gitinguha nga madala ang maong inisyatibo ngadto sa Gagmay’ng Kristohanong Katilingban (GKK) ug sa tagsa-tagsa ka panimalay.

Dili lamang kini proyekto alang sa pagpanindot sa palibot. Usa usab kini ka pamaagi sa pagdasig sa matag pamilya nga mahimong responsable nga magbalantay sa kinaiyahan, samtang makabenepisyo sa ilang kaugalingong panginahanglan sa pagkaon ug panginabuhian.

Ang training gitambungan sa mga Pangulo sa Alagad ug mga miyembro sa Caritas, nga gilauman mahimong mga kaabag sa pagpalambo ug pagpadayon sa programa sa ilang tagsa-tagsa ka komunidad.

Usa sa giduso sa maong panagtapok ang paggamit sa composting isip pamaagi sa paghimo og natural nga abono gikan sa organikong basura. Pinaagi niini, ang mga nahibiling materyales sama sa mga dahon ug uban pang organikong sagbot mahimong mapuslanon pag-usab imbis nga mahimong basura lamang.

Ang praktikal nga demonstrasyon gipangulohan ni Mr. Maxey Atog gikan sa St. Francis of Assisi Parish, La Verna Hills, Buhangin, Davao City, nga mipaambit sa iyang kahibalo ug kasinatian sa urban gardening ug composting.

Pinaagi sa aktuwal nga demonstrasyon, mas nasabtan sa mga partisipante nga ang pagpananom dili kinahanglan komplikado o mahal. Ang importante mao ang pagkamamugnaon, pagkamainantuson, ug pag-atiman sa mga tanom.

Nahiuyon ang maong programa sa panawagan sa Simbahan alang sa pag-atiman sa atong common home. Ang pagpananom, pag-recycle, pag-compost, ug paglikay sa pag-usik sa mga kahinguhaan mao ang gagmay apan makahuluganon nga mga lakang sa pag-atiman sa gasa sa Diyos nga mao ang kalibotan.

Sa laing bahin, ang urban gardening mahimong makatabang usab sa panimalay sa mas praktikal nga paagi. Ang mga produkto sa tanaman mahimong konsumo sa pamilya, nga naghatag sa libre ug presko nga mga utanon nga mahimong mapadako uban sa husto ug luwas nga pamaagi. Kon adunay sobra nga ani, mahimo usab kini nga dugang kita alang sa pamilya.

Ang programa adunay bug-os nga suporta sa Parish Priest, Rev. Fr. Dionisio Tabiliran, DCD, uban ni Fr. Danilo Dotollo, DCD. Ang ilang suporta nagpakita sa tinguha sa parokya nga ang pag-atiman sa kinaiyahan dili lamang kutob sa mga pulong ug panudlo, kondili mahimong makita sa konkretong mga kalihukan nga makaabot hangtod sa matag panimalay. Naghatag ang proyekto og usa ka yano apan lawom nga pahinumdom: ang pag-atiman sa kalibotan magsugod sa gagmay nga mga buhat. Gamay man kini tan-awon, apan kon buhaton sa daghang pamilya, mahimo kining usa ka dakong kalihokan alang sa kinaiyahan, panimalay, ug komunidad.

Sa Holy Family Parish, ang pagpananom dili lamang mahitungod sa pagpatubo og mga tanom. Kini usa ka pagpatubo usab sa responsibilidad, pagtinabangay, pag-atiman sa binuhat sa Diyos, ug paglaum alang sa mas malungtarong kaugmaon. (Flor Arellano-Deloria | HFP SoCCom)