FRIDAY WITH THE PROPHETS: Pagpaminaw sa Tingog sa mga Propeta

Gihimo matag Biyernes niining bulana sa Septiyembre 2026 ang “Friday with the Prophets,” usa ka programa sa pagporma, pagpamalandong, ug pagpaambit nga gisugdan niadtong Septiyembre 4, 2026 ug matapos karong Septiyembre 25, 2026. Gitambongan kini sa nagkalainlaing mga lider sa GKK ug mga ministriya dinhi sa San Pedro Cathedral Parish.

Ang maong programa giandam sa Parish Formation Committee, ubos sa pagdumala sa Spiritual Director nga si Fr. Evan Esmade, Parochial Vicar, uban kang Sr. Lucy Marie Atuel, OSB, Formation Sister-in-Charge, ug sa ilang mamumulong nga si Professor Hector S. Damaso, uban sa ilang mga kaubanan sa pagporma.

Ang Friday with the Prophets usa ka higayon alang sa pagporma, pagpamalandong, ug pagpaambit mahitungod sa mga mensahe sa mga propeta sa Daang Tugon sama nila Isaias, Jeremias, Daniel, Amos, Oseas, ug uban pa. Atong gisusi kung unsa ang ilang gipahayag ngadto sa katawhan sa ilang panahon ug kung unsaon nato pag-apply sa ilang mga mensahe sa atong kinabuhi isip mga Kristohanon ug mga piniyalan sa atong tagsa-tagsa ka katilingban.

Pinaagi sa mga propeta, madungog nato ang mensahe ug tingog sa Ginoo nga nagtawag kanato ngadto sa paghinulsol, hustisya, pagkamatarong, ug pag-alagad, ilabi na alang sa mga kabus ug nanginahanglan.

Dinhi usab nato masabtan nga ang usa ka propeta dili lamang usa ka tawo nga nanagna mahitungod sa umaabot. Ang propeta mao usab ang nahimong tingog sa Ginoo, nga matinud-anong nagpadangat sa Iyang mensahe ngadto sa katawhan. Sa atong panahon karon, ang mensahe sa mga propeta nagpahinumdom kanato nga kinahanglan kitang motindog alang sa kamatuoran, mangita sa hustisya, ug maningkamot alang sa kaayohan sa atong isigkatawo.

Ang mga propeta sama nila Amos, Miqueas, Malakias, ug uban pa, nanawagan alang sa hustisya, pagkamatarong, ug pagpanalipod ug pag-alagad sa mga kabus. Gamhanan gihapon ang ilang mga mensahe hangtod karon tungod kay daghan niini nga mga panawagan may kalabotan sa mga kahimtang nga atong nasinati sa kasamtangang panahon.

Mao nga gipanghingusgan sa maong Formation Committee sa San Pedro Cathedral ang mapadayunon nga pagtuon sa Bibliya o Balaang Kasulatan, aron mas masabtan nato ang Pulong sa Ginoo ug atong mapasa ang maong pagtuo ug kaalam ngadto sa atong mga kabataan, pamilya, ug tagsa-tagsa ka katilingban.

Busa, angayan gayud nato nga tun-an ug pamalandongan ang Balaang Kasulatan. Kay dinhi nato makita ang walay katapusang gugma sa Ginoo, ang Iyang kabubut-on alang kanato, ug ang dalan padulong sa kaluwasan. (Rosalinda Jabonillo – San Pedro Cathedral)