Kinaiya sa pakighiusa, kasinatian sa kalooy

Ika-26 nga Domingo sa Ordinaryong Panahon (September 27, 2026)
Ez 18:25-28 / Ps 25:4-5, 6-7, 8-9 / Phil 2:1-11 / Mt 21:28-32

Ang tawo nga nakasinati sa pasaylo ug kaayo sa Ginoo magpuyo niini diha sa buhat. Ang kinaiya sa nakasinati sa pagdawat ug pagangkon pagbalik ngadto sa Dios, dili makatago niini sa matag adlaw niya nga pagpuyo diha sa pakighiusa.

Susama nga panghuna-huna, pagbati ug panglantaw maoy duso sa unang pagbasa. Magkalahi man siguro ang pamaagi, kapaspason ug kahimtang sa pagkinabuhi, apan ang tumong, padulngan ug kab-utonon usa ra. Ang pakighiusa sa kabubut-on, plano ug tumong sa Ginoo dakong hagit. Dili iya-iya nga lakang kondili hiniusang aksiyon ang makatabang. Kung buot nato makab-ot ang kaayohan sa tanan, dili ang pansarili ug kinaugalingon lamang nga tuyo maoy makasulbad. Dili ang kagikan o tribu, ug dili ang kolor ug estado sa kinabuhi, kondili ang hiniusang pagbati, tumong ug lihok.

Sa ikaduhang pagbasa gipunting ang pagbag-o sa kaugalingon alang sa matarung nga dalan. Ang kausaban usa ka panaw dili gikan sa pagminatarong padulong sa pagbinuang, kondili gikan sa binuang nga mga buhat ngadto sa pagbinuotan. Ang matuod nga pagbag-o mao ang pagbiya sa mga bisyo ug mga buhat sa sala ngadto sa pagbuhat sa katarong. Mabuhi ang tawo nga mobiya sa sala ug mobuhat sa matarong. Apan kamatayon ang sangputan sa tawo nga mobiya sa kaayo ug magbuhat og binuang. Molahutay unta kita sa pagbuhat sa katarong ug matintal sa kaharuhay lamang.

Busa, angay nga adunay kausaban sa huna-huna, desisyon ug aksiyon. Sa Ebanghelyo, gipasabot nga dili diay angay nga maulaw ang tawo nga mag-usab sa kaugalingon nga desisyon. Hinunoa, kahimut-an siya sa Ginoo kung ang kausaban tinukmod sa kaamguhan aron mopili sa Ginoo. Malipay ang Dios kaniya ug mahatagan siyag kaluwasan, panalangin ug kalinaw sa kinahiladman. Busa, bisan paman kon isalikway ka tungod sa imong paglikay sa nianang ug bisyo, dawat ug himoa ang pag-usab sa imong desisyon.

Nan, mosangpit kita sa Dios sa pag-ingon: hinumdomi ang imong kalooy, O Ginoo. Kita nga iyang kaloy-an, hatagan gayod sa gasa sa pakighiusa.