Laudato Si’ Launching Mass ug Dungan nga Paglimpyo sa mga Kapilya Gilunsad sa San Pedro Cathedral Parish

Gipahigayon ang Launching Mass para sa Laudato Si’ — usa ka pagsugod sa atong panaw isip usa ka komunidad nga nagtubag sa tawag sa Dios ug sa tawag sa kinaiyahan. Gipangulohan ni Fr. Junel E. Bustamante ang Santos nga Misa, diin ang Pulong sa Dios naghatag kanato og lawom nga pagpahinumdom: ang kalibutan, ang atong Simbahan, ug ang tanan nga anaa niini — dili atong gipanag-iya, kondili gasa nga gisalig kanato sa Ginoo aron ampingan ug atimanon.

Sa iyang homiliya, gipaambit ni Fr. Junel ang mensahe ni Papa Francisco: “Ang tanan magkahiusa — ang yuta, ang tawo, ang Dios.” Ang pag-atiman sa atong kapilya dili lang paglimpyo sa bungbong ug salog; kini simbolo sa atong pagtugot sa pagbag-o sa atong kaugalingong kinabuhi, ug pagpasalig nga ampingan nato ang tibuok natong komon nga panimalay nga mao ang kalibutan.

Kaniadtong Agosto 26 nahitabo ang dungan paglimpyo diha sa tagsa-tagsa nga Kapilya sa GKK. Giapilang tanan sa batan-on ug tigulang, lalaki ug babaye, nagdala og silhig, trapo, ug balde. Ang matag lihok puno sa gugma: ang pagtrapo sa altar, paglimpyo sa mga lingkuranan, paghapay sa salog nga nagpakita nga kini dili lang buluhaton, kondili pagsimba ug pagpasalamat sa Dios sa Iyang pagkamanggihatagon.

Kini nga adlaw nagtudlo kanato nga ang tinuod nga pagtuo makita dili lang sa mga pag-ampo, kondili sa mga buhat sa pag-atiman ug pag-alagad. Sa dihang naglihok kita nga nagkahiusa, nagpakita kita sa tinuod nga diwa sa sinodalidad diin kita mag-uban sa paglakaw, mag-uban sa pagtukod, mag-uban sa pag-atiman sa gasa nga gihatag kanato sa Ginoo.

“Ampingi ang akong balay, ampingi ang akong kalibutan — kay kini ang gasa nga akong gihatag kaninyo.”

Salamat sa tanan nga mipahinungod sa oras ug kusog. Hinaot nga kini nga panaw magpadayon dili lang sa kapilya, kondili sa atong mga panimalay, sa atong mga barangay, ug sa tibuok atong kinabuhi. (Akiramae Davao, San Pedro Cathedral SoCCom)