Mga Mananabtan gipa-ilalum sa pormasyon

Sa usa sa mga talagsaon nga pagporma nga espesipikong gitumong alang sa mga Mananabtan sa Archdiocese of Davao, gipahigayon sa Parish Formators sa San Miguel – Panacan, ang usa ka Formation niadtong Agosto 30, 2026, sa Seminar Hall 2 sa parokya, nga gitambongan sa 67 ka mga Mananabtan gikan sa San Miguel Parish ug sa ubang mga parokya.

Lakip sa mga niapil ang mga Mananabtan gikan sa St. James the Great Parish, Bunawan ug Our Lady of Fatima Parish, Boulevard, nga mipakita usab sa ilang interes sa mas lawom nga pagsabot sa maong kalihokan.

Dili lamang ang praktikal nga paagi sa pagpanguna sa pag-ampo ang gipunting sa formation. Gituki usab ang mas lawom nga pundasyon sa ilang pag-alagad pinaagi sa tulo ka mga session: “Ang Tulo ka Estado sa Simbahan,” “Ang Sakramento sa Pagkumpisal ug Debosyon sa mga Kalag sa Purgatoryo,” ug “Espiritwalidad sa Mananabtan isip Piniyalan ni Cristo.”

Pinaagi niini, gipasiugda nga ang pagka-Mananabtan dili lamang usa ka buluhaton nga kinahanglan kahibaloan, kondili usa ka ministeryo nga nagkinahanglan og hustong kahibalo, lig-on nga pagtuo, ug espiritwal nga pagpangandam. Sa pagpanguna sa siyam ka adlaw nga pag-ampo alang sa mga kalag, ang Mananabtan gitugyanan sa paggiya sa mga pamilya ug komunidad sa pag-ampo ug paglaum alang sa ilang mga minahal nga nangamatay.

Tungod niini, ang maong formation nahimong usa ka importante nga pahinumdom nga sa dili pa mangulo sa pag-ampo alang sa uban, ang tig-alagad mismo kinahanglan padayon nga maporma.

Nagpasalamat ang San Miguel Parish–Panacan kang Rev. Fr. Rolando O. Mandreza, Kura Paroko, sa iyang pagtugot sa pagpahigayon sa formation ug sa mainitong pagdawat sa mga Mananabtan gikan sa ubang mga parokya.

Samtang nakita ang nagkadakong interes alang sa maong pagporma, nagpahayag usab sa ilang pagkaandam ang San Miguel Parish–Panacan Parish Formation Team sa pagpaambit niini ngadto sa ubang mga komunidad nga nagtinguha nga mapalalom ang pag-alagad sa ilang mga Mananabtan.

Kay ang maayong pag-alagad magsugod sa maayong pagporma. (Ma. Joneila Laruya | San Miguel Parish – Panacan)