Pagpasaylo: Dalan sa Kagawasan

Ika-24 nga Domingo sa Ordinaryong Panahon (September 13, 2026)
Sir 27:30-28:7 / Ps 103:1-2, 3-4, 9-10, 11-12 / Rom 14:7-9 / Mt 18:21-35

Kung sa niaging Domingo kita gihagit sa mga pagbasa aron walay mahimulag kanato, magpasidaan kita tinukmod sa gugma sa tawo nga nakasala, karong Domingoha, giawhag kita sa pagpuyo niini pinaagi sa pagpasaylo.

Sa Ebanghelyo, gipasabot ni Jesus kang Pedro nga ang pagpasaylo walay pag-ihap o pagkwenta. Sama sa walay sukod nga gugma sa Dios, grasya sa usa ka tawo ang pagdawat sa pasaylo ug pagpaabot niini sa bisan kinsa nga nanginahanglan. Ang tawo nga nakasinati sa kalooy ug kaayo sa Ginoo, angayan lamang nga makapaambit sa maong pasaylo ngadto sa uban. Kung lisod ang pagpasaylo, hinumdomi ug batia ang susamang panginahanglan nimo nga pasayloon. Unta ikaw usab mo paambit sa pasaylo ngadto sa uban sa pasaylo nga imong gikinahanglan.

Mao gani nga sa unang pagbasa, gipasabot kanato ni Propeta Sirach nga ang manimalos mag-antos. Ang nagdumot walay maangkon nga pagkaalim sa mga samad sa sala. Ang dili makapasaylo dili angayan nga makapangayog pasaylo. Kung ipalabi sa tawo ang iyang pagkatawo, walay angay siya nga pasayloon. Busa, ayaw dumti ang nakasala. Hinumdomi ang kaayo sa Dios kanimo ug ipaambit kining maong nindot nga kasinatian ngadto sa nangandoy sa kalinaw. Wala kitay padulngan kung mohari ang garbo ug dili kita makapasaylo.

Kini tungod kay wala man kita gihimo sa Dios nga magpuyo alang sa kaugalingon lamang. Gitumong kita alang sa maayong relasyon. Gigamhan kita sa maayong pakiglambigit sama sa gisaysay sa ikaduhang pagbasa. Dili kita makalikay sa gugma ug kaayo sa Ginoo nga may nahimo kanato nga makighalubilo sa isigkatawo. Iya man kita Dios, buhi kon patay. Ang kamatayon sa Manunubos maoy atong kusog ug inspirasyon sa maong pakiglambigit.

Busa, pagpahisama sa Dios nga maayo ug maloloy-on. Dugay siya masuko kay puno siya sa kalooy.