Panaghiusa og Pagsaulog sa Adlaw’ng Natawhan sa Langitnong Inahan

Sa malipayong pagsaulog sa Adlawng Natawhan sa Mahal nga Birhen Maria, Inahan ni Kristo nga Manluluwas, ang mga parokyano sa Holy Family Parish, Baliok nagtapok sa sayong kabuntagon alang sa Santo Rosaryo ug prosisyon, isip pagpahayag sa ilang gugma ug debosyon kang Mama Maria. Ang maong kalihokan nagpakita sa lig-on nga pagtuo sa katawhan nga naglakaw nga nag-uban sa pag-ampo ug pagpamalandong sa kinabuhi sa Mahal nga Birhen.

Human sa prosisyon, gisundan kini sa Balaang Misa nga gipangulohan ni Rev. Fr. Dionisio C. Tabiliran, DCD, Parish Priest. Ang Santos nga Misa gitambongan sa daghang mga parokyano nga naghalad og mga bulak isip simbolo sa ilang lawom nga gugma, pagpasalamat, ug debosyon kang Mama Maria. Ang paghalad sa bulak nahimong timaan sa pag-ila sa iyang kaputli, pagkamapaubsanon, ug sa iyang hingpit nga pagsalig sa kabubut-on sa Diyos.

Human sa Misa, usa ka yano apan makahuluganon nga panag-ambitay ang gipahigayon sa Parish Pavilion nga giandam sa mga GKK Servant Leaders. Napuno sa kalipay ug panaghiusa ang mga nanambong samtang nag-uban sa pagpasalamat alang sa mga grasya nga nadawat pinaagi sa panalipod ug pag-ampo ni Mama Maria. Ang maong selebrasyon nahimong pahinumdom sa tanang magtutuo sa kaimportante sa pagpakita sa sama nga pagkamapaubsanon ug pagsalig sa Diyos nga gipakita sa Inahan sa atong Manluluwas. (Flor Arellano-Deloria, HFP SoCCom | Photos: Parish Social Media Team)