San Agustin: Pagkamaampoong Nakapadasig sa Nagalawig nga Katilingban

Nagsaulog ang GKK Sr. San Agustin sa Forestal sa ika-48 nga kapistahan uban sa tema: Sr. San Agustin, Sumbanan sa Pagka-maampoon sa Katilingban nga Nagalawig Isip mga Piniyalan. Ang maong kapistahan ginasaulog matag katapusang Sabado sa Agosto.

Kaniadtong adlawng Sabado, Agosto 29, 2026 sa alas nuwebe sa buntag mao ang Santos nga Misa nga gitambongan sa mga miyembro ug sa mga kasikbit nga kapilya sa sona uno. Humana niana adunay gamay nga salo salo alang sa mga nanimba.

Gipaambit sa nangulo sa Santos nga Misa nga Rev. Fr. Orlando A. Angelia ang Kura Paroko sa St. Mary of the Perpetual Rosary Parish nga walay mga Santos nga wala makasala kaniadto. Si San Agustin nailhan nga usa ka badlungon nga anak ngadto sa iyahang inahan nga si Santa Monica. Sa makanunayong pag-ampo sa usa ka inahan ngadto sa iyahang anak, gitubag kini sa Ginoo ug gani nahimo si San Agustin nga usa ka Obispo ug Doktor sa Simbahan. Dugang pa ni Fr. Orly nga angay lamang nga dili dayon kita mangluod kung ang atong mga pag-ampo wala pa gihatag kanato, ug hinaut nga mahisama unta kita kang Santa Monica nga wala kawad-i og paglaum.

Adunay panultihon si San Agustin nga mao ang “Ang Akong Kasingkasing walay pahuway hangtod nga kini makapahuway diha kanimo” ug ang ikaduha “Himoa ang gugma ug buhata ang imong gusto.”

Isip pagpangandam gisugdan ang unang pagnobena niadtong Agosto 20, 2026 sa alas siete sa gabii human adunay input nga gihatag si Sis Jing Saniel GKK Animator, ikaupat nga adlaw input speaker Bro. Ian Murillo (PARECO), ikalima nga adlaw Bro. Art Pamisan (Alliance of Two Hearts), ug sa ikaunom nga adlaw gikan Bro. Danilo Aparece (CFD). Kaniadtong Agosto 28, 2026, Biyernes, giprusisyon ang patron sa alas kwatro sa hapon pinaagi sa pagrosaryo dayon gisunod ang ikasiyam nga adlaw sa pag nobena.

Malipayong Pista kanatong tanan.

Viva Sr. San Agustin!

(By Annielyn Aunso Abe, SMPRP GKK SoCCom | Photos by Jocelyn Vidamo)