21 Ka Tuig sa Panaghiusa ug Pagpanalipod ni Sr. San Miguel

Puno sa kalipay, debosyon, ug espiritu sa pagtinabangay ang gipahigayong ika-21 nga Pista sa San Miguel Parish sa Marahan, usa sa mga parokya ubos sa Archdiocese of Davao. Dala ang makahuluganong tema nga “21 Ka Tuig Sa Panaghiusa Ug Pagpanalipod ni Señor San Miguel,” nagkahiusa ang tibuok komunidad sa paghatag ug pasalamat sa tanang grasya ug panalipod nga nadawat pinaagi sa intersesyon sa ilang patron.

Dako usab ang pagpasalamat sa komunidad sa walay kupas nga paggiya sa ilang dynamic, masadyaon, ug aktibo nga kura paroko nga si Fr. Ariel Bulan, MJ. Pinaagi sa iyang ka-enthusiastic, puyos nga passion, ug detalyadong pagpahiluna ug pagsanay sa tanang kalihokan sa parokya, nahimong hapsay ug hapit perpekto ang tibuok pagsaulog sa kapistahan. Apan luyo sa maayong pagpangulo sa kura paroko, dili usab mapanalipdan nga kung wala ang hugot nga pagserbisyo sa nagkalain-laing ministriya sa parokya, dili gayod mahimong magmalampuson ug mabulukon ang maong pista. Ang ilang dedikasyon ug sakripisyo mao ang nahimong lig-ong pundasyon aron matuman ang tanang plano.

Usa sa mga nag-unang nitambong ug nakigsaulog sa maong mabulukong kalihokan mao ang katilingban sa Holy Cross of Davao College (HCDC). Sukad pa niadtong tuig 2021 hangtod karon, ang San Miguel Parish mao ang usa sa mga pinalanggang partner communities sa HCDC. Pinaagi sa maong pakig-uban, nagapadayon ang paghatag sa tunghaan ug mga formation programs, seminars, ug uban pang mga inisyatiba nga makatabang sa pagpalambo sa espirituhanon ug sosyal nga bahin sa parokya, diin gilangkuban kini sa 19 ka mga Gagmay’ng Kristohanong Komunidad (GKK).

Gisaulog sa parokya ang ilang kapistahan matag ikaupat nga Domingo sa Septyembre. Ang highlight sa maong adlaw mao ang gipahigayong Pontifical Mass nga gipanguluhan mismo sa Arsobispo sa Davao, ang Most Rev. Romulo G. Valles, D.D. Tungod kay dako ug espesyal kini nga okasyon, hapit tanang miyembro sa San Miguel Parish ang nitambong ug nipadayag sa ilang hugot nga pagtuo. Dili lang ang mga parishioners ang nitambong, kay aktibo usab nga misalipmot ug niduyog ang lainlaing mga tunghaan ug barangay sa maong dapit.

Nakakatag man ang kabukiran, nakit-an sa Misa ang lawom nga debosyon sa katawhan. Nakatandog kaayo sa kasingkasing ang gipahigayong paghalad sa mga gasa diin namatud-an ang kasagrado ug kalidad sa maong pagsaulog nagdalit ang mga tao ug nagkadaiyang preskong mga gulay isip timaan sa ilang dakong pagpasalamat sa mabulukong abot sa ilang yuta. Labaw sa tanan, makatandog kaayo nga tan-awon ang pagkadaghang mga bata nga personal nga naghalad ug mga rosas alang sa ilang patron nga si Señor San Miguel, nga nagpakita sa kaputli sa pagtuo nga gitanom na sa mga batan-ong henerasyon.

Luyo sa kadaghan sa tawo, nakita ang usa ka hapsay ug organisadong pagsaulog. Aron mas mapalig-on ang fellowship ug pag-inambitay sa pagkaon, nagbutang sila og lima (5) ka mga station booths diin nagtipon-tipon ang matag zona aron mag-abiabi ug magdungan sa pagpaniudto. Dili usab malimtan ang pagkamaabiabihon ug kaadunahan sa maong dapit—tinuod gyud nga basta naa ka sa bukid, abunda gyud ang pagkaon! Miabot sa siyam (9) ka mga lechon ang gisalosaloan sa mga parishioners, nga nagpakita sa kapuno sa grasya ug pagkabukas sa kamot sa matag usa. Puno usab sa sadya ang palibot tungod sa mga giandam nga nagkadaiyang pasundayag ug mga kulbahinam nga padula nga naghatag ug dakong kalipay sa tanang nitambong.

Ang ika-21 nga kapistahan sa Parokya San Miguel sa Marahan nagpamatuod nga pinaagi sa hugot nga pagtuo, maayong pagdumala sa kura paroko, panagduyog sa tanang ministriya, ug lig-ong pakig-uban sa mga institusyon sama sa Holy Cross of Davao College, nagpadayon nga buhi, busog, ug nagkahiusa ang usa ka Kristohanong komunidad ubos sa proteksyon ni Señor San Miguel. (Jeralyn Babet Adegue Palero | HCDC Social Action Coordinator)