Ang Labing Importanteng Sugo

Ika-30 nga Domingo sa Ordinaryong Panahon (October 25, 2026)
Ex 22:20-26 / Ps 18:2-3, 3-4, 47, 51 / 1 Thes 1:5-10 / Mt 22:34-40

Ang bitik sa batid sa balaod kang Jesus kung unsay pinakadakong sugo nahimong higayon nga iyang mapasabot ang kahulogan sa balaod. Ang sumada sa balaod nga miabot sa 613 tanan, mosangko lamang sa tininuod ug maayong relasyon sa Ginoo ug sa isigkatawo. Ang kasing-kasing, huna-huna ug kalag maoy naglangkob sa kinahiladman sa usa kawo. Ania niini ang iyang pagkasiya nga dili ikalimod ug walay ikatago. Mao nga gihagit ni Jesus kitang tanan sa paghigugma sa Dios sa walay pagpihig ug walay lipod-lipod.

Ang pagpadayag sa matinud-anong paghigugma sa Dios, sams sa gihisgutan sa ikaduhang pagbasa, anaa diha sa pagsimba ug pagsunod kaniya dili sa mga mini nga diosdios. Ang maong pagpadayag gipuy-an pinaagi sa pagsalig kaniya ug dili sa paghimong dios sa mga butang nga lumalabay o sa gahum nga mahanaw o sa impluwensiya nga dili mohangtod. Ang paghigugma sa Dios mapakita diha sa pagpunting sa mga desisyon ug lihok nga makalipay sa Dios dili sa tawo o sa kaugalingon lamang. Malipay ang Dios kung ang atong paghigugma kaniya atong ipakita diha sa pagrespeto ug pag-atiman sa isigkatawo.

Mao nga sa unang pagbasa gihagit usab kita nga ang konkretong kasugoan sa Dios nga labing importante mao ang pagpasidungog sa buhi nga tawo. Kini mapakita diha sa pag tabang sa nanginahanglan ug dili sa pag pamintaha kanila. Kini mahimo sa pagpabangon sa mga nalunod sa kalisdanan ug dili sa pag gamit kanila aron pagpadato sa kaugalingon. Kini mapadayag sa pagbati sa panginahanglan sa mga byuda, sinalikway ug mga langyaw ug dili sa pagyatak sa ilang kaubos ug pagkatimawa. Ang pagserbisyo kanila sa tinuoray nga walay pagpaabot og pahalipay ug balos maoy tinuod nga timaan sa gugma nga Diosnon.

Busa, buhata ug puy-i ang paghigugma sa Dios pinaagi sa paghigugma sa isigkatawo. Sa ingon niini, ang Salmo mokaog sa imong kasing-kasing: gihigugma ko ikaw O Dios, akong kusog.