Bulawanong Kasaulogan: Ika-50 Ka Tuig sa GKK Sto. Rosario Buri Gym Buhangin

Malampusong gisaulog sa GKK Sto. Rosario, Buri Gym, Buhangin ang ilang ika-50 nga Anibersaryo ug Kapistahan niadtong Oktubre 07, 2026, Miyerkules nga puno sa pagpasalamat, pagkahiusa, ug debosyon ngadto sa Mahal nga Birhen sa Santo Rosario.

Isip espirituhanong pagpangandam sa dakong pista, gipahigayon ang 9-Day KSP-Novena nga gisuportahan sa tibook Sona 4 gikan Setyembre 28 hangtod Oktubre 06, 2026.

Ang maong novena gisaulog ug gisponsoran sa tanang GKK nga sakop sa Zona 4, nga nagpakita sa lig-on nga panaghiusa ug pagtinabangay sa matag katilingban. Matag gabii, lain-laing GKK sa Zona 4 ang nanguna sa pag-ampo, pag-awit, ug paghalad, timaan sa ilang pagkahiusa diha kang Kristo ug kang Birhen Maria.

Sa bisperas sa pista, Oktubre 06 Martes, alas 3 sa hapon, gipahigayon ang Prosisyon sa Imahen sa Mahal nga Birhen sa Rosario nga milibot sa komunidad sa Gkk Sto Rosario Buhangin.

Ang kinapungkayan nga bahin sa selebrasyon mao ang Balaang Misa niadtong Oktubre 07, 2026 sa alas 10 sa buntag. Gipangulohan ang Santos nga Misa ni Rev. Fr. Leo Armada, CSsR, kauban ang Parish Worker nga si Bro. Babino Casanaan Jr.

Sa pagsugod sa Misa, usa ka talandugon nga halad ang gihimo diin 50 ka mga Flower Pots ang gihalad sa mga sponsors ngadto kang Birhen Maria nga simbolo sa 50 ka tuig nga pagtoo, gugma, ug pag-alagad sa kapilya. Nagpasalamat sab ang Pangulo sa Katilingban nga si Elizabeth Canoy- Serenado ug iyang gipasidunggan ang mga niaging mga PSK nga nagdumala sa kapilya sa mga niaging panahon. Ang maong Balaang Misa nasaksihan usab sa Facebook pinaagi sa Live Coverage sa DXGN 89.9 Spirit FM. Pagkagabii, nagpadayon ang kalipay pinaagi sa Search for Teen Sto. Rosario nga gi-organisa sa mga Civic Members sa komunidad.

Sa 50 ka tuig nga paglawig, nagpabiling buhi ug lig-on ang GKK Sto. Rosario sa Buri Gym. Usa kini ka testamento nga kung magkahiusa ang komunidad, magpadayon ang misyon sa pag-alagad.

Viva La Virgen del Santisimo Rosario!

(By Mary Grace Gonzales, OMPH SoCCom)