Ihatag sa Ginoo ang himaya ug dungog

Ika-29 nga Domingo sa Ordinaryong Panahon (October 18, 2026)
Is 45:1, 4-6 / Ps 96: 1, 3, 4-5, 7-8, 9-10 / 1 Thes 1:1-5 / Mt 22:15-21

Maayo man alang kanimo ang pagdumala sa bisan unsang panggamhanan, ang himaya ug dungog alang lamang sa Ginoo.

Niining panahon nga kita mangutana asa kaha kita dalhon niining kahimtang sa atong panggamhanan karon, gobyerno man o simbahan gidapit kita dili sa paghimog pagsupak sa usa ka partido, ni pagpahilayo sa Simbahan nga naggiya sa atong pagtoo. Gani ang Ebanghelyo nagpahimangno kanato nga sanglit kita gibuhat sa hulagway sa Ginoo, nan puy-an nato ang maong tawag nga mahisama kaniya bisan unsa man ang atong kahimtang. Wala untay mga lakang ug desisyon nga magtukmod kanato sa panagbingkil ug pagtibulaag, kondili ang angay mao untay atong mahimo taliwala sa daghang mga hiwi nga nasinati nato. Ang mga butang iya sa tawo atong ihatag apan ihatag usab nato ang iya sa Ginoo kay kaniya kita nahisakop ug dili ni bisan kinsang tawo sa gahum.

Hinumdoman nato nga bisan kinsa ang anaa sa panggamhanan, sama sa nadungog nato sa unang pagbasa, ang Dios maoy nagtugot niini. Walay molabaw sa gahum sa Dios nga maoy gamhanan sa tanan, ang dunay awtoridad sa tanang naghupot ug awtoridad. Kung ang anaa sa gahum nahikalimot man o wala na moila sa Dios nga mitugot nga sila maghupot og gahum, sa kaulahian ang plano sa Dios mopatigbabaw gihapon. Walay gahum nga yutan-on ang molungtad gawas kon itugot sa Dios nga kaning gamhanan mohangtod. Ang matag gahum iyang gitugot aron maghatag higayon nga ang Dios maila nga mao gayod ang gamhanan sa tanan.

Busa, sama sa gisaysay sa ikaduhang pagbasa, ang imoha ug akoa nga pagkatawo wala mag-agad sa naglingkod nga tawhanong panggamhanan. Ang atong identidad o pag-ila sa atong kaugalingon dili masayran tungod sa pamunoan nga tawhanong. Ang atong dungog nagsukad ug nakasalalay isip mga pinangga ug gipili sa Dios. Anaa kita nianang dungoga ug pag-ila kung kinsa kita. Busa, dili kita magpadala sa mga haylo o tanyag nga lumalabay. Walay kolor o partido o gamhanan nga tawo ang angay nga mohupot ug mokontrolar sa atong mga desisyon ug lihok, kondili ang gugma ug kaayo sa Ginoo nga nagpili kanato.

Kung ang atong pagkahulagway sa Dios, ang iyang labaw nga gahum ug ang gugma’g kaayo sa Ginoo maoy sukdanan sa atong pamatasan ug pagkibabuhi, mahatagan gayod nato og himaya ug dungog ang Ginoo. Matud pa ni San Ireneo, “ang himaya sa Dios mao ang tawo nga buhi sa kinatibuk-an.”