Kuwarenta ka Tuig sa Katilingbang Nagkahiusa Uban ni Santa Maria

Isip kabahin sa kasaulogan sa ika-40 nga kapistahan sa St. Mary of the Perpetual Rosary Parish Buhangin nga ginasaulog matag unang Domingo sa Oktubre uban sa tema: “Nagkahiusang Katilingban sa Maampoong Pagpanaw Uban ni Santa Maria sa Makanunayong Pagrosaryo”, adunay gihimo nga pagpangandam ang parokya sa pagpangulo sa Kura Paroko nga si Rev. Fr. Orlando A. Angelia.

Una na diha ang Panaw-Duaw (kon Marian Pilgrimage) sa napulo ka Sona diin gihimo ang pagnobena ug Santos nga Misa nga nagsugod niadtong Septembre 14, 2026 ug nahuman kini Septembre 25, 2026.

Aduna usab gipahigayon nga Sakramento sa Kumpirma sa alas nuebe sa buntag niadtong Septembre 19, 2026 nga gipanguluhan sa atoang halangdon nga Arsobispo sa Davao Most. Rev. Romulo G. Valles, D.D. Anaa usab ang Kasalan ng Parokya sa mga wala pa nakadawat sa Sakramento sa kaminyoon ug nahitabo kini Septembre 26, 2026. Aduna usab mga kalihukan nga gihimo nga mao ang Schools/Educators night, Beneficiary night, PARECO night, GKK night, Youth Night ug ang pinaka unang nahitabo sa parokya nga mao ang sportsfest nga giapilan sa mga GSLs diin nag-indigay sila sa volleyball, basketball, pickleball ug chess challenge. Ug gani ang atong mga kaparian, seminarista ug mga bisita aduna usab panagsangka sa gihimo nga sportsfest diin nakahatag kini og kalingaw ug sportsmanship.

Nagsugod ang Nobena niadtong Septembre 25, 2026 Biyernes sa alas singko sa hapon mao ang pag-ampo sa Santos nga Rosaryo, gisundan kini sa pag nobena dayon ang Santos nga Misa nga gipanguluhan ni Rev. Fr. Orlando A. Angelia ang unang adlaw. Ang ikaduhang adlaw hangtod ikasiyam ang nangulo sa Misa mao ang mga invited priests nga gikan sa laing parokya ug mga kongregasyon.

Sa adlaw’ng Sabado Oktobre 2, 2026 human sa Misa sa ala Sais sa buntag adunay Bayanihan sa Parokya uban sa tema: “Maghiusa, Mag-alagad ug Magtinabangay Alang kang Santa Maria sa Makanunayong Pagrosaryo”, ug gitambongan kini sa napulo ka Sona nga nahisakop sa parokya ug PARECO. Matag Sona adunay lugar kung diin didto sila manglimpyo. Human niana adunay giandam nga pagkaon aron salusaluhan sa tanan.

Sa alas tres sa hapon gihimo ang pag prosisyon uban ang napulo ka zonal patroness. Pagbalik sa parokya gibuhat ang pag blessing sa mga imahe. Pagkahuman sa final blessing ni Fr. Orly, gipangbalhin ang mga imahe sulod sa parish. Sa wala madugay gisunod ang katapusang Nobena dayon ang Santos nga Misa.

Adlawng Domingo Oktobre 4, 2026 mao ang pagsaulog sa ika-40 nga kapistahan sa St. Mary of the Perpetual Rosary Parish Buhangin. Gisugdan kini sa Santos nga Misa sa alas Sais sa buntag nga gipanguluhan ni Most. Rev. George Rimando DD, sa alas otso nga Misa mao si Rev. Fr. Orlando Angelia DCD Parish Priest, sa alas diyes si Rev. Msgr. Paul Cuison JCD, sa alas tres y medya Rev. Msgr. Edgar Rodriquez DCD ug sa alas singko y medya ang nangulo sa Santos nga Misa mao ang atong halangdon nga Arsobispo sa Davao Most. Rev. Romulo G. Valles, D.D.

Una, iyang gidasig ang matag usa kanato nga mangayo og grasya aron magpabiling matinagdanon sa presensya ug paggiya sa Dios, nga makat-on sa pag-ila sa iyang mga buhat sa adlaw-adlaw nga kinabuhi. Isip usa ka maayong tigpataliwala, si Maria nagtudlo kanato nga mamati kita pag ayo sa Dios ug moabli sa atong mga mata sa iyang direksyon.

Ikaduha, iyang gidapit ang matag usa sa paghangyo kang Maria nga ubanan kita sa pag ampo ug sa atong mga pangandoy, samtang nagpabiling abli sa kalinaw nga gikan sa Dios. Iyang gipahinumdoman ang “Fiat” ni Maria ug ang iyang mga pulong. “Ang akong kalag nagadayeg sa Ginoo”, isip pananglitan sa usa ka kasingkasing nga gawasnong abli sa kabubut-on sa Dios.

Katapusan, gidasig ni Arsobispo Valles ang matag usa nga motan-aw pinaagi kang Maria alang sa mas lalom nga pagsabot kon kinsa ang Dios ug kinsa si Hesus. Tungod kay nagpabilin siya sa tiilan sa krus, nahibal-an ni Maria ang kasing kasing sa iyang anak ug nasabtan ang grasya sa Dios bisan sa mga panahon sa pag antos. Pinaagi sa iyang pagpatiwala, ang matag usa gidapit nga makaila kang Kristo sa mas lalom nga paagi, mogunit pag ayo kaniya isip tigpanalipod ug magpabilin nga masaligon nga si Maria mouban kanato sa tibuok natong kinabuhi.

Human sa Santos nga Misa adunay programa sa Parish gym, fellowship dinner, video presentation, dance presentation, awarding of medals and certificate for sportsfest winners, giving of rice and cash ug naa pud photobooth sa mga gusto magpahulagway. Daghan kaayong Salamat sa mga nagsponsors.

Viva Maria! Viva Hesus! Malipayong Fiesta kanatong tanan. (Annielyn Aunso Abe, GKK SoCCom)