Paglaum sa Pagpanalipod sa Buhing Tubig Mituyhakaw

Adunay paglaum nga mituyhakaw alang sa pagpanalipod sa buhing tubig nga kabahin sa watershed area sa Tawan-tawan, Baguio District diin makita ang pagtubo sa kapin 5000 ka mga punuan sa kahoy nga gisugdan ug tanom sulod sa 1.5 ka ektarya nga luna sukad pa niadtong Septembre tuig 2022.

Sa pagbisita ug balik sa mga sakop sa Desk for the Care of Creation gikan sa mga Parokya Oktubre 20, 2026, isip usa sa mga kalihukan sa Season of Creation 2026, malipayong nasaksihan sa mga sakop sa Archdiocesan Desk for the Care of Creation nga gipanguluhan ni Engr. Charleo Modequillo ubos sa Commission on Social Action – Justice and Peace (CSA-JP) nga lapas na sa tawo kon 3 hangtod 4 ka metros na ang gitas-on sa mga punuan sa kahoy sa maong dapit.

Launching of the Tree Planting and Caring at Tawan-tawan, Baguio District, Calinan, Davao City last September 17, 2026.

Kauban usab ang mga sakop sa Parish Social Action, ug mga Parish Disaster Response Team (PDART) sa Archdiocese of Davao misaka ug balik sa Tawan-tawan alang sa usa ka Tree Caring Activity aron subling motahan sa pag-amuma sa gitawag nga Common Home.

Sa Facebook post sa Archdiocesan Social Action Center (ASAC), gipasabot nga ang maong kalihukan nagpahinumdum sa tanan nga ang pagtanom ug mga kakahoyan maoy sinugdanan lamang.

Ang pag-amuma, pagpanalipod ug pagseguro sa ilang pagtubo mao ang nag-una ug gikinahanglan nga mga lakang sa pagtukod ug usa ka mas lunhaw, mas himsog ug mas malungtaron nga kinaiyahan.

(Photo: ADCC-ASAC)

Sa pagsaulog sa Season of Creation matag bulan sa Septembre, gilauman nga ang maong inisyatibo makadasig sa tanan nga mamahimong tiunay nga mga piniyalan sa kabuhatan sa Diyos, sa pag-ila nga ang matag punuan sa kahoy nga gi-amuma karon makatampo ngadto sa usa ka mas maayong kaugmaon alang sa mosunod nga henerasyon.

Busa giaghat sa ADCC ang tanan nga padayong amumahon ang mga punuan sa kahoy, panalipdan ang kinaiyahan, ug maghimo ug mahinungdanon nga aksyon alang sa pag-preserbar sa nag-inusarang pinuy-anan sa tanan, sanglit ang ginagmay nga mga buhat karon makapahidangat ug malungtaron nga kinabuhi ug paglaum alang sa ugma damlag.

Matud ni Modequillo nga mokabat sa 21 ka mga Parokya inubanan sa mga tulunghaan, mga pundok sa simbahan ug uban pang mga kapunungan ang nakatampo sa pagtanom sa Tawan-tawan nga karon mituybo na nga usa ka umaabot nga lasang nga maoy makapanalipod sa tinubdan sa buhing tubig alang sa tanan.