Pangandoy nga mabulahan

Kapistahan sa Tanang mga Santos (November 1, 2026)
Rv 7:2-4, 9-14 / Ps 24:1-2, 3-4, 5-6 / 1 Jn 3:1-3 / Mt 5:1-12

Unsa bay imong kinatas-an nga pangandoy? Pangandoy mo ba nga masantos? Nangandoy ka ba nga makasud-ong sa panagway sa Ginoo?

Ingon si San Agustine nga mag-alingasa ang atong kasing-kasing hangtod nga makapahulay kini sa Ginoo. Kining maong pagsud-ong sa Dios o pagpahulay diha kaniya maoy gihulagway diha sa unang pagbasa. Kini ang panan-awon sa kataposan sa panahon kung ang purong-purong sa langit ato nang maangkon. Kini ang gipasabot sa unang pagbasa. Kini atong maangkon human kita nagmatinud-anon taliwala sa mga pag-antos ug kasakit.

Dili pa nato kini kaayo matugkad karon kung maunsa gayod kita, sama sa gisulti sa ikaduhang pagbasa. Mahisama kita sa Dios kung moabot na kita kaniya, kung mapadayag na kanato ang tanan. Malaumon lamang unta kita kanunay nga moila kaniya pinaagi sa atong matinud-anong pagsunod sa iyang kabubut-on ug pagpahimuot kaniya pinaagi sa maayong buhat.

Sa maayong buhat nagsukad ang matuod nga pagkabulahan, sumala sa Ebanghelyo. Ang mga misalig sa Dios bisan sa unsang kahimtang, maoy bulahan. Kini ang kinabuhi sa mga Santos nga taliwala sa kagutom, kaguol, paglutos ug pagsulay, nagpabiling masaligon sa Ginoo. Mag-unsa man ang kabuhong, kaharuhay ug kahawod sa mata sa tawo kung wala kay pagsalig sa Dios, kung gibati gihapon nimo ang pagkulang ug dili kontento? Kung bisan diha sa kakabos, masaligon ug matinud-anon ka, nan tinuod nga bulahan ka kay ang tanan lumalabay. Dios lang ang magpabilin sa kanunay. Ang mga butang, posisyon o bisan unsang naangkon, mahanaw, apan ang Dios mohangtod.

Busa, pangandoya ang pagkabulahan ug kasantos. Paningkamoti ang pagsalig ug kaayo sa kanunay kay mao kini ang dalan sa kasantos ug pagkabulahan. Pangandoya ang panagway sa Dios.