“TOTUS TUUS”: Dinner for a Cause: Nagkahiusang mga Parokyano Alang sa Katukoran sa Bag-ong Simbahan sa Saint John Paul II

Naghiusa ang mga parokyano sa St. John Paul II Parish niadtong Oktubre 10, 2026, alang sa Dinner for a Cause uban sa tema: “Totus Tuus: Totally Yours, Iyong Iyo, Hingpit Akong Imo,” usa ka kalihokan nga naglayon sa paglikom og pondo alang sa nagapadayong pagtukod sa simbahan.

Pinangulohan sa Parish Pastoral Finance Council ug Parish Pastoral Council, ang maong kalihokan nagpunting nga maghiusa ang mga parokyano, GKK Servant Leaders, ug mga miyembro sa nagkalainlaing sektor sa parokya.

Ang temang “Totus Tuus,” nga nagpasabot og “Totally Yours” o “Hingpit Akong Imo,” naghatag og pamalandong sa hingpit nga pagtugyan sa kaugalingon ngadto sa Ginoo. Nahiuyon usab kini sa diwa sa pagtuo, panaghiusa, ug pag-alagad nga gipakita sa mga parokyano pinaagi sa hiniusang paningkamot alang sa pagtukod sa simbahan.

Ang maong kalihokan mao ang ikaduhang Dinner for a Cause sa parokya. Niadtong Oktubre 7, 2023 diin gipahigayon kini sa Mergrande Ocean Resort, ubos sa kanhi kura paroko nga si Rev. Fr. Russell Bantiles. Niadtong panahona, ang katuyoan sa paglikom og pondo alang sa atop sa simbahan kon “A Roof for my Father’s House: A Dinner for A Cause”. Nahibalik ang maong inisyatiba sa kasamtangang panahon uban sa bag-ong kura paruko, Rev. Fr. Leif Simbajon, nga nagpakita sa padayong paningkamot sa parokya aron matuman ang tumong nga adunay tukmang dapit alang sa pagsimba ug panaghiusa sa mga magtutuo.

Usa sa mga gipasundayag mao ang usa ka teatro uban sa Parish Youth Apostolate nga naghulagway sa kinabuhi ni San Juan Pablo II, ang patron sa parokya. Pinaagi sa maong presentasyon, gipahinumdoman ang mga parokyano sa kinabuhi, pagtuo, ug mga hiyas na angay sulondon sa Santos nga naghatag og inspirasyon sa daghang magtutuo, sukad pa kaniadto hangtud karon, ilabina sa kabatan-onan.

Nagpakita usab og suporta ang religious sectors sama sa congregasyon sa AJC Sisters ug Padre Pio’s Home for Children nga mipasundayag og mga kanta dinuyogan og Rondalia ug ang pagtugtog usab ni Matthew Neale Sayson sa violin. Sa pagtapos sa maong aktibidad, gikanta sa mga parokyano ang Aprite le Porte ug ang Gozos ni San Juan Pablo II isip pagpasidungog sa patron ug pagpangandam alang sa umaabot nga kapistahan sa parokya ug misunod dayon ang katapusang panalangin.

Magpadayon ang ikaduhang hugna sa Dinner for a Cause nga gitakdang ipahigayon karong Oktubre 19, 2026, alang sa mga kaparian, mga bisita, ug mga parokyano gikan sa ubang mga parokya sa Archdiocese sa Davao.

Ang maong mga kalihokan kabahin sa pagpangandam sa parokya alang sa kapistahan ni San Juan Pablo Segundo karong Oktubre 22. Pinaagi sa panaghiusa, paghalad, ug pagtinabangay, gipakita sa komunidad nga ang pagtukod sa bag-ong simbahan dili lamang sa pisikal nga estruktura, kondili usa ka espirituhanon usab nga adunay usa ka hiniusang misyon sa pagpalig-on sa pagtuo ug pag-alagad sa Ginoo. (Jemarie Santamina, Dhyessil Mae Sab, Jonathan Paeldilan)