Pagbaton og kahadlok

Ika-33 na Domingo sa Ordinaryong Panahon (November 15, 2026)
Prv 31:10-13, 19-20, 30-31 / Ps 128: 1-2, 3, 4-5 / 1 Thes 5:1-6 / Mt 25:14-30

Mahadlokon ka ba? Kang kinsa o unsa bay imong kahadlokan? Ug nganong nahadlok ka man?

Ang sambingay diha sa Ebanghelyo mahitungod sa piniyalan, nagsaysay kanato nga ang ikatulo nga gibinlan og bahandi wala nakapatubo niini. Wala siyay ganansiya nga gikabalik sa agalon pagpaningil na niini. Ngano? Tungod kay siya nahadlok. Kining kahadlok niya nga nakaagaw sa iyang pagsalig sa iyang agalon. Kung misalig lang unta siya ug mihimog pamaagi nga mapatubo ug mapalambo ang gipiyal ug gibilin kaniya, magantihan unta siya. Misalig ka ba sa Ginoo ug gipalambo mo ang imong mga gasa nga nadawat gikan kaniya? Gipatubo ba nimo kini pinaagi sa pagpaambit niini ngadto sa uban?

Taliwala sa makalilisang nga mga hitabo ug makapaluya nga kahimtang, ang ikaduhang pagbasa nagpahimano kaayo sa dili pagkalisang. Walay kahadlok bisan pa man sa Kris is o kaguliyang nga posibleng moabot alang sa tawo nga masaligon sa Dios. Sa kasinatian sa kangitngit sa ekonomiya, politika, panginabuhian o bisan sa espirituhanong kasinatian, ang matuod nga mahadlokon sa Ginoo, dili maluya. Mopadayon siya sa pagbuhat og maayo. Dili siya magtulog-tulog sa pagpangitag higayon aron makatabang unsaon nga makalingkawas ang kadaghanan gikan sa kalisod. Dili siya mosugnod aron mosilaob ang kagubot, kondili magdala siyag kahayag ug paglaum. Ikaw ba nakadan-ag ug nagdalag paglaum?

Sama usa ka asawa nga gihisgutan sa unang pagbasa, kitang katawhan sa Dios giawhag nga mahinumdom sa ag asawa nga gipangga pag-ayo sa Dios. Ang Iyang himaya wala sa porma sa atong bayho ug hitsura. Ang makapahimuot sa Dios wala sa atong kalimpyo sa gawas o panglawas, kondili anaa sa atong kinaiya nga sa a sa usa ka babaye ka sang kaanyag anaa sa pagkamahadlokon sa Ginoo. Ang atong maayong batasan ug pagrespeto sa isigkatawo maoy makapahimuot sa Ginoo. Anaa sa pagkamaatimanon sa mga gagmay ug kabos ang kaanyag sa kasing-kasing nga nagsukad sa kahadlok sa Dios. Ikaw ba matinabangon sa mga ubos ug naglisod?

Paninguhaon ta, sama sa Salmo ang paglakaw sa dalan sa Ginoo. Motubo unta kita sama sa tanom pinaagi sa dakong pagsalig ug pagtahod sa Ginoo. Kay bulahan gayod mahadlokon sa Ginoo.