Parokya sa San Juan Pablo Segundo sa Los Amigos, Malipayong Nagsaulog sa Ika-15 nga Kapistahan

Oktubre 22, 2026 || Gisaulog sa tibook sakop sa parokya sa San Juan Pablo Segundo sa Los Amigos ang ika-15 nga kapistahan uban sa tema: “Totus Tuus: Totally Yours, Iyong-iyo, Hingpit akong Imo” uban usab sa sub-theme nga: “Lolek: 4K-Ko”. Ang maong kasaulogan nahimong usa ka makahuluganon nga higayon sa pagpasalamat, pag-ampo, ug pagpalig-on sa pagtuo sa Diyos, uban sa paghinumdom sa kinabuhi ug panulondon ni San Juan Pablo II.

Nagsugod ang maong kasaulogan sa Unang Misa sa alas 6:00 sa buntag, nga gipangulohan sa Kura Paroko din mikonselebrar si Fr. Russell Bantiles, nga kanhi kura paroko sa maong parokya. Gisundan ang maong Misa sa alas 10 ang takna sa buntag pinaagi sa Pontifical Mass nga gipanguluhan sa halangdong Arsobispo sa Dabaw Most Rev. Romulo G. Valles D.D uban sa mga pari gikan sa nagkalainlaing parokya nga mikoncelebrate sa Santos nga Misa. Kini usab usa ka dakong lakang sa tanang parokyano nga sakop sa parokya kay ang mga Misa gihimo sulod na sa bag-o ug padayon nga ginatukod nga simbahan aron usab maipakita sa tanan ang bunga sa pagpaningkamot aron matukod ang ginamithi nga simbahan nga sakop sa Los Amigos.

Usa sa mga sentrong mensahe sa kapistahan nga gipadayag sa atong Arsobispo mao ang bantog nga mga pulong ni San Juan Pablo II: “Non abbiate paura”—“Ayaw kamo kahadlok.” Kini nga mensahe nag-awhag sa tanan Katoliko nga dili magpadala sa kahadlok, kalisdanan, ug kawalay kasigurohan sa kinabuhi, kondili mosalig sa gahom ug gugma ni Hesukristo. Ang iyang pag-awhag nga “Ablihi pag-ayo ang mga pultahan alang kang Kristo” nagpahinumdom sa tanan nga ablihan ang ilang mga kasingkasing ngadto sa Ginoo aron tugotan ang Iyang gugma, kamatuoran, ug kaluoy nga magbag-o sa ilang kinabuhi. Ang tema nga Totus Tuus, nga sa Latin nagkahulogang “Hingpit akong Imo” nagpahayag sa hingpit nga pagtugyan sa kaugalingon ngadto sa Diyos pinaagi sa pagpataliwala sa Mahal nga Birhen Maria. Kini usa ka pagdapit sa matag magtutuo nga itugyan ngadto sa Ginoo ang ilang mga plano, talento, kalisdanan, ug mga pangandoy, uban sa hingpit nga pagsalig sa Iyang kabubut-on. Pinaagi niini nga debosyon, gipahinumdoman ang komunidad nga ang pagtuo dili lamang makita sa pagtambong sa mga seremonyang relihiyoso, kondili labi na sa adlaw-adlaw nga pagkinabuhi pinaagi sa pag-ampo, pagpaubos, pagkamaloloy-on, ug pag-alagad sa isigkatawo. Atol usab sa kapistahan gihimo sa alas 6 nga misa ayha nagsugod ang pag blessing sa mga letchon matag Zona nga maoy salu-saluhan sa tanang parokyano sa pagpaniudto. Human usab sa Pontifical Mass gihimo ang pagpasundayag sa mga talento sa mga ministriya sa atong parokya ug ang makalingaw nga Fiestalympics 2026.

Subay usab sa pagsaulog sa kapistahan ni San Juan Pablo Segundo, gihimo ang tinuig nga “Pilgrim Pope Visit”, si San Juan Pablo nailhan isip Pilgrim Pope tungod sa iyang pagbisita sa nagka lain laing mga nasud sa tibuok kalibutan aron ipakaylap ang Ebanghelyo, kalinaw, magpalig-on sa pagtuo, ug ipahinumdom sa katawhan ang gugma sa Diyos. Nahitabo ang Pilgrim Pope Visit sa nagkadaiyang Zona sa atong parokya, gihimo usab bisperas sa fiesta ang Pope Mobile Procession ug gituyok ang tanang sakop sa parokya. Gihimo usab ang mga lakang alang sa paglikom ug pundo nga makatabang ug magpadayon sa katukuran sa simbahan, gihimo ang Dinner for a Cause nga nahitabo sa duha ka hugna. Ang unang hugna niadtong Oktubre 10, 2026 alang sa mga GKK Servant Leaders ug mga parokyano ug miyembro nga sakop sa parokya. Ang ikaduhang hugna niadtong Oktubre 19, 2026 kini alang sa mga kaparian, sponsors, benefactors ug mga parokyano sa nagkadaiyang parokya sa Arkidayosis sa Dabaw. Niadto usab Oktubre 17, 2027 gihimo usab ang Ginang ng Parokya and Tawag ng Tanghalan sa Parokya ug Raffle Bonanza a Raffle Ticket for Cause.

Sa pagtapos sa maong makahuluganon nga selebrasyon, ang tibuok komunidad sa parokya giawhag sa pagpadayon sa panaw sa pagtuo nga adunay kaisog, paglaom, ug gugma. Uban sa inspirasyon sa mga pulong nga “Ayaw kamo kahadlok” kita gitawag ug ang matag usa nga mahimong instrumento sa kalinaw, panaghiusa, ug gugma sa Ginoo ngadto sa uban. Hinaot nga pinaagi sa pagpataliwala ni San Juan Pablo II, ang Parokya sa Los Amigos magpadayon sa pagtubo diha sa pagtuo, pagpalig-on sa panaghiusa, ug hingpit nga pagtugyan sa kaugalingon ngadto sa Ginoo. (Jonathan Paeldilan | Photos: St. John Paul II Parish SoCCom)